2.500 króna verðmunur á sögubók

Nýjar skólabækur fyrir framhaldsskóla eru ódýrastar í ritfangaversluninni A4 - Office 1, samkvæmt nýrri könnun ASÍ. Eymundsson í Kringlunni er oftast með hæst verð á nýjum bókum.

Verðlagseftirlit ASÍ kannaði verð á nýjum og notuðum skólabókum í bókaverslunum á höfuðborgarsvæðinu á þriðjudag. Farið var í átta verslanir. Mál og menning á Laugavegi neitaði þátttöku.

Mestur munur var á sögubókinni „Nýir tímar“, sem var dýrust hjá Eymundsson á 5.499 krónur en ódýrust á 2.999 krónur hjá Griffli. Þar munar 83 prósentum. Flestir titlar á lista ASÍ voru til í Bókabúð Iðnú, eða 31 af 33. A4 – Office 1 og Bóksala stúdenta áttu til 27 titla og Eymundsson 25.

Í þeim þremur verslunum þar sem boðið er upp á skiptibókamarkað, var A4 – Office 1 oftast með lægsta verðið á notuðum skólabókum eða á 22 af 23 titlum. Griffill var oftast með hæsta verðið, eða á 19 titlum. Í tilkynningu frá ASÍ segir að hafa beri í huga að verð á algengum bókatitlum breytist oft ört í verslunum við upphaf skólaárs.- sv