Hjálparstarf kirkjunnar aðstoðar við kaup á skóladóti

Hátt í fimm hundruð börn og unglingar þiggja aðstoð frá hjálparstarfi kirkjunnar í haust við að kaupa skólabækur og vetrarfatnað. Markmið starfsins er meðal annars að koma í veg fyrir að framhaldsskólanemar flosni upp úr námi vegna fjárhagserfiðleika.

Nú þegar skólarnir eru að hefjast í þessarri viku þurfa margar fjölskyldur að greiða háar fjárhæðir fyrir skólavörur fyrir veturinn. Það er hins vegar ekki á allra færi og hefur hjálparstarf kirkjunnar lagt sig fram við að aðstoða efnaminni fjölskyldur við kaup á skóladóti.

„Annars vegar eru það börnin sem eru að hefja nám í grunnskólanum þessa daga, þá erum við að aðstoða með inneign sem fólk getur farið og keypt upp í það sem að kostar að hefja nám," segir Vilborg Oddsdóttir, félagsráðgjafi hjá Hjálparstarfi kirkjunnar.

Þá fá framhaldsskólanemendur niðurgreiðslu á skólagjöldum og bókum. Vilborg segir hátt í fimm hundruð börn og unglinga hafa fengið aðstoð á síðasta ári og þörfin sé að aukast.

„Það hefur verið að fjölga, sérstaklega þeim sem eru í framhaldsskólunum, og við höfum lagt mikla áherslu á það í mörg ár að besta leiðin út úr vítahring fátæktar er menntun og við viljum gera allt sem við gerum til að halda þeim inni og stundum eru það bara skólagjöldin og bækurnar sem veltur á," segir Vilborg.

Þá þurfi líka að kaupa íþróttafatnað og vetrarúlpur sem þau reyna að aðstoða við kaup á.

„Með þessarri aukningu sem hefur verið þá viljum við hvetja fólk til að aðstoða okkur svo við getum gert þetta vel. Svo þessi börn þurfi ekki að líða mismun. Það er nóg um einelti í skólunum og þessi börn geti verið í innanhússkóm en ekki berfætt af því að foreldrarnir hafa ekki efni á því," segir Vilborg.