Barni­er tekur illa í hug­myndir John­son

Michel Barnier, aðalsamningamaður Evrópusambandsins í Brexit-málum, er sagður allt annað en ánægður með tillögur Boris Johnson, forsætisráðherra Breta, um útgönguna sem hann kynnti loks formlega í gær.

Barnier tekur afar illa í hugmyndir Johnson sem gera ráð fyrir því að Bretland fari úr sambandinu þann 31. október.

Samkvæmt tillögunum yrði Norður-Írland áfram innan lagaramma ESB til 2025 en ekki innan innri markaðar sambandsins. Það fæli í sér tollaeftirlit við landamæri Norður-Írlands og Írlands frá og með 1. janúar 2021.

Barnier er sagður hafa lýst þessum hugmyndum sem gildru sem Evrópusambandið myndi aldrei falla í. Þá hafa Írar tekið afar illa í hugmyndina þannig að svo virðist sem hún sé andvana fædd.

Johnson kynnti hugmyndir stjórnar hans á flokksþingi Íhaldsflokksins í Manchester í gær. Lagði hann þar sömuleiðis línurnar fyrir nýjar þingkosningar, verði boðað til slíkra.