Framkvæmdastjóri Fuglaverndar segir lög um fuglavernd löngu úrelt

Framkvæmdastjóri Fuglaverndar vill sjá skýrari ramma til að sækja mál vegna rána á eggjum friðaðra fugla. Núgildandi lög um fuglavernd séu löngu úrelt. Endurskoðun laga um fuglavernd stendur yfir í umhverfisráðuneytinu.

Fréttablaðið greindi frá því á föstudag að maður hafi verið dæmdur til að greiða 450.000 krónur í sekt fyrir að stela eggjum friðaðra fugla og reyna að flytja þau úr landi. Maðurinn var tekinn í Norrænu árið 2017.

Hann hafði í fórum sínum 100 blásin egg sem hann hafði tínt frá fágætum og friðuðum fuglum. Forstöðumaður Náttúrustofu Norðausturlands segir í fréttinni að ekki sé tekið nógu hart á slíkum brotum.

Hólmfríður Arnardóttir, framkvæmdastjóri Fuglaverndar, segir núverandi lög um fuglavernd úrelt að flestu leyti. Tímabært sé að endurskoða lögin, undirbúningur þess hafi staðið yfir í sex ár.

„Fuglavernd vildi gjarnan sjá skýrari ramma og við vonumst til þess að ný lög sem eru núna í smíðum hjá umhverfis- og auðlindaráðuneytinu verði þannig að ramminn verði ljósari. Refsingin sem slík þarf að hæfa glæpnum en það er í fyrsta lagi mjög erfitt að sækja þessi mál.“