Innlent

Á­kærður fyrir kyn­ferðis­lega á­reitni gegn tveimur sam­starfs­konum

Sunna Kristín Hilmarsdóttir skrifar
Héraðssaksóknari fer með málið.
Héraðssaksóknari fer með málið. vísir/vilhelm

Héraðssaksóknari hefur ákært karlmann fyrir kynferðislega áreitni gagnvart tveimur samstarfskonum sínum. Brotin sem maðurinn er ákærður fyrir áttu sér stað á árunum 2014 og 2015 og varða þau við 199. grein almennra hegningarlaga sem fjallar um kynferðislega áreitni.

Maðurinn vann með konunum á veitingastað í Reykjavík. Gagnvart annarri þeirra er hann ákærður fyrir að hafa í nokkur skipti tekið utanklæða um rass hennar og kreist hann, í eitt skipti klipið hana í annað brjóstið utanklæða og í nokkur skipti kysst hana á munninn.

Þá er hann einnig ákærður fyrir að hafa í nokkur skipti viðhaft kynferðisleg ummæli um útlit konunnar við hana. Konan fer fram á að maðurinn greiði henni eina milljón í miskabætur.

Gagnvart hinni konunni er maðurinn ákærður fyrir að hafa í nokkur skipti nuddað kynfærum sínum, utanklæða, við rass hennar. Þá er honum einnig gefið að sök að hafa í nokkur skipti tekið utan um rass hennar og brjóst og kreist og í nokkur skipti kysst hana á munninn.

Að auki er maðurinn ákærður fyrir að hafa haft uppi kynferðisleg ummæli við konuna um útlit hennar og hvað hann myndi vilja gera með henni. Konan fer fram á að hann greiði henni tvær milljónir króna í miskabætur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.