Flutningur fjögurra hrúta tilkynntur til lögreglu

Matvælastofnun hefur óskað eftir lögreglurannsókn á meintum flutningi fjögurra lambhrúta frá Vestfjörðum til Norðurlands eystra. Þetta kemur fram í tilkynningu á vef Matvælastofnunar. Óheimilt er að flytja sauðfé yfir varnarlínur nema í sérstökum undantekningartilfellum að fengnu leyfi stofnunarinnar.

Í tilkynningu segir að meintur flutningur hrútanna hafi uppgötvast við eftirlit. Flutningsbann var í kjölfarið sett á skepnurnar.

Viðtakandi hrútanna er sagður hafa sótt um leyfi til Matvælastofnunar um kaup á fimm lambhrútum úr Vestfjarðahólfi vestra árið 2016. Þeirri umsókn hafi verið hafnað. 

Þá er sérstaklega tekið fram í tilkynningu að tilgangur dýrasjúkdómalaga sé m.a. að hindra útbreiðslu dýrasjúkdóma og vinna að útrýmingu þeirra.

„Samkvæmt þeim lögum ákveður ráðherra, að fengnum tillögum Matvælastofnunar, hvaða varnarlínum skuli haldið við. Varnarlínur eru ákveðnar til að verja eftir föngum bústofn bænda fyrir dýrasjúkdómum.“