Von á hríðar­veðri þar sem inn­viðir hafa ekki jafnað sig eftir af­taka­veðrið

Veðurstofan hefur gefið út gula veðurviðvörun fyrir Norðurland eystra, Austurland að Glettingi, Austfirði, Suðausturland og Miðhálendi. Viðvaranirnar byrja að taka gildi eftir hádegi á morgun og gilda víða fram á föstudagsmorgun.

Er til að mynda spáð norðaustan hvassviðri eða stormi, 15 til 25 metrum á sekúndu á Suðausturlandi og Miðhálendi. Þá er spáð allhvassri norðaustanátt 13 til 18 metrum á sekúndu með éljum eða snjókomu og mögulega skafrenningi á Norðurlandi eystra og Austurlandi.

Birgir Örn Höskuldsson, veðurfræðingur hjá Veðurstofunni, segir þetta kannski vera óvenjulítinn vind fyrir viðvörun en segir að stuttur tími frá síðasta óveðri á þessu svæði hafi áhrif.

„Það mun fylgja ofankoma á þessu svæði og innviðirnir eru kannski ekki endilega búnir að jafna sig eftir veðrið í síðustu viku, þannig að svona hríðarveður kemur ofan í kannski ekkert glæsilegt ástand.“

Þá muni það að öllum líkindum hafa áhrif á færð á vegum að það er nú þegar víða mikill snjór.

„Það er ekki bara úrkoman sem slík heldur er það kannski aðallega að það er töluverður fyrri snjór sem er að spila inn í.“

Fólk á Norðurlandi, Austfjörðum og Miðhálendi þar sem hríðarviðvörun verður í gildi er beðið um að fylgjast vel með veðurspá og upplýsingum frá Vegagerðinni um færð á vegum á meðan gula viðvörunin er í gildi.

Fólk á Suðausturlandi einnig beðið um að fara varlega og hugsa sig tvisvar um áður en það keyrir undir Öræfajökli þar sem hviður gætu náð 35 metrum á sekúndu. Það á sérstaklega við um stór ökutæki sem taka á sig mikinn vind.