Innlent

Ó­­væntar vendingar í máli Pól­­stjörnu­manna minna á mál Frank­líns Stein­er

Birgir Olgeirsson skrifar
Vinur Franklíns Steiner reyndi að taka á sig sök í máli þar sem Franklín var sakaður um vörslu fíkniefna árið 1996.
Vinur Franklíns Steiner reyndi að taka á sig sök í máli þar sem Franklín var sakaður um vörslu fíkniefna árið 1996. FBL/GVA
Óvænt framvinda í máli Pólstjörnumannanna, sem ákærðir eru fyrir amfetamínframleiðslu í Borgarfirði, minnir um margt á mál Franklíns Steiners frá tíunda áratug síðustu aldar.



Þrír eru ákærðir fyrir framleiðslu á rúmum átta kílóum af amfetamíni í sumarbústað í Borgarfirði, þeir Alvar Óskarsson, Einar Jökull Einarsson og Margeir Pétur Jóhannsson.



Eftir að málið hafði verið þingfest fyrir Héraðsdómi Reykjavíkur í september síðastliðnum barst lögreglu, saksóknara og verjendum í málinu bréf frá íslenskum manni sem ekki er ákærður í málinu. Sá sagðist bera alfarið einn ábyrgð á framleiðslunni ásamt ónefndum Pólverja.



Gaf Íslendingurinn sama framburð við aðalmeðferð málsins í Héraðsdómi Reykjavíkur í gær. Hann sagði ástæðuna fyrir játningunni vera samviskubit sem hefði nagað hann.

Alvar Óskarsson og Einar Jökull eru meðal þriggja sem ákærðir eru fyrir amfetamínframleiðsluna.Vísir/Vilhelm
Maðurinn er góður félagi þeirra Alvars og Einars Jökuls, en þeir hlutu þunga dóma í Pólstjörnumálinu fyrir um áratug. Þeir eiga yfir höfði sér þungan dóm fyrir framleiðsluna á amfetamíninu. Getur hún varðað allt að tólf ára fangelsi.



Ákæruvaldið telur frásögn félaga þeirra, sem segist bera ábyrgð á amfetamínframleiðslunni, ekki trúverðuga. Segir saksóknari að gögn málsins bendi til sektar mannanna þriggja sem eru ákærðir í málinu. 



Ákærðu í málinu neita sök og segja félagann bera ábyrgð á amfetamínframleiðslunni. Er það dómara að meta hvort frásögn félagans sem vill taka sökina á sig sé trúverðug.

Vinur Franklíns tók á sig sök

Árið 1997 dæmdi Hæstiréttur Franklín Kristinn Steiner til 20 mánaða fangelsisvistar eftir að 252 grömm af amfetamíni, tæp 76 grömm af hassi og 6,7 grömm af maríjúana fundust á heimili hans í Hafnarfirði í apríl árið 1996.



Franklín Steiner kannaðist ekki við fíkniefnin sem lögreglan fann við húsleitina. Hann taldi líkur á að félagi hans sem hafði lykil að heimili hans ætti efnin. Vinurinn mætti fyrir dóm og sagðist eiga efnin. Var vinurinn að lokum ákærður fyrir að hafa borið rangt fyrir dómi í málinu gegn Franklín Steiner.

Atli Gíslason, fyrrverandi þingmaður, yfirheyrði tugi lögreglumanna og skilaði viðamikilli skýrslu um starfsemi fíkniefnadeildar á sínum tíma þegar altalað var að Franklín Steiner væri undir verndarvæng lögreglunnar. Engin ákæra var gefin út.Vísir
Hann var sýknaður í Héraðsdómi Reykjaness en Hæstiréttur sneri dómnum þar sem vinurinn var dæmdur til þriggja mánaða fangelsisvistar fyrir falskan vitnisburð. Var Franklín Steiner ákærður fyrir hlutdeild með því að hafa hvatt vininn til að greina ranglega frá. 



Ekki þótti þó nægilega sannað, gegn eindreginni neitun Franklíns og vinar hans, að háttsemi Franklíns hefði verið með þeim hætti og hann því sýknaður.

Sá umtalaðasti

Franklín Steiner var óumdeilanlega umtalaðasti maður undirheima Íslands á tíunda áratug síðustu aldar. Var Franklín jafnan sagður hafa verið undir verndarvæng lögreglunnar gegn því að veita upplýsingar um fíkniefnamál. Fékk hann meðal annars reynslulausn eftir að hafa afplánað helming fangelsisvistar, sem hann var dæmdur fyrir árið 1989, fyrir slíkar upplýsingar.

Lögreglan á höfuðborgarsvæðinu hefur aðsetur á Hverfisgötu.Fréttablaðið/GVA
Urðu samskipti Franklíns Steiner og lögreglunnar að svo miklu hitamáli í samfélaginu að dómsmálaráðherra ákvað árið 1997 að óska eftir því að ríkissaksóknari myndi stýra opinberri rannsókn til að staðreyna sannleiksgildi fullyrðinga um að Franklín Steiner stundaði umfangsmikil fíkniefnaviðskipti með vitund og samþykki lögreglunnar.



Frægt er þegar Franklín Steiner sagðist einfaldlega hafa verið heppinn í spilakössum þegar hann var spurður út í fimm milljóna króna tekjur sem hann hafði árið 1996.



Franklín Steiner lést 66 ára að aldri árið 2013. 

Tengd skjöl


Tengdar fréttir

Vinur Pól­stjörnu­manna tekur á sig alla sök og segist plagaður af sam­visku­biti

Þremenningarnir sem ákærðir eru fyrir amfetamínframleiðslu í Borgarfirði neituðu allir sök við aðalmeðferð málsins í Héraðsdómi Reykjavíkur. Íslendingur, sem sendi lögreglu, saksóknara og verjendum bréf þar sem hann lýsti yfir ábyrgð á amfetamínframleiðslunni, hélt frásögn sinni til streitu við aðalmeðferð málsins og segist plagaður af samviskubiti.

Sakborningar skulu víkja úr sal í amfetamínsmálinu

Héraðsdómur Reykjavíkur hefur fallist á kröfu saksóknara í umfangsmiklu fíkniefnamáli þess efnis að sakborningar gæfu skýrslu hver fyrir sig við aðalmeðferð málsins. Úrskurður þess efnis var kveðinn upp í morgun. Saksóknari gerði kröfuna til að koma í veg fyrir að ákærðu gætu samræmt frásögn sína.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.