Innlent

Flutti í fjarlægan fjörð til að vinna dýrustu landbúnaðarvöru Íslands

Kristján Már Unnarsson skrifar
Ástrós Bergsveinsdóttir flutti úr Reykjavík til Austfjarða til að starfa við íslenskan æðardún.
Ástrós Bergsveinsdóttir flutti úr Reykjavík til Austfjarða til að starfa við íslenskan æðardún. Sgtöð 2/Egill Aðalsteinsson.
Fyrirtæki sem fullvinnur æðardún hefur verið sett á stofn á Borgarfirði eystra. Þar er þessi dýrasta landbúnaðarvara Íslands sett í sængur og þær síðan seldar sem lúxusvara. Þetta mátti sjá í fréttum Stöðvar 2. 

Íslenskur dúnn ehf. er í litla bláa húsinu.Stöð 2/Egill Aðalsteinsson.
Í þessu eitthundrað manna byggðarlagi munar um þau tvö til þrjú störf sem framkvæmdastjóri Íslensks dúns ehf., Ragna Óskarsdóttir, vonast til að skapist í litla bláa húsinu, sem áður þjónaði sem leikskóli byggðarinnar. Núna er þar dúnmjúk starfsemi. 

Ragna segir tækifærin í æðardúni vannýtt.

Ragna Óskarsdóttir, framkvæmdastjóri Íslensks dúns ehf.Stöð 2/Egill Aðalsteinsson.
„Vegna þess að við Íslendingar framleiðum um 75 prósent heimsframleiðslu æðardúns en við flytjum hann að megninu til út sem hrávöru til Japans og Þýskalands, þar sem hann er þveginn og settur í sængur, og með miklum hagnaði fyrir þarlenda aðila. Við viljum sem sagt koma fullvinnslunni hingað heim til Íslands,“ segir Ragna. 

Dúninn setja þau i sængur.

Ástrós hreinsar dúninn.Stöð 2/Egill Aðalsteinsson.
„Það gengur ótrúlega vel að selja þetta. Við í rauninni fórum bara af stað núna í sumar og hérna sérðu það sem er búið að panta nú þegar og við afhendum í nóvember. Þetta er að fara fram úr okkar björtustu vonum.“ 

Hér er höndlað með mikil verðmæti; dýrustu landbúnaðarvöru Íslands, segir Ragna. Æðardúninn fá þau úr næsta nágrenni, frá Sævarenda í Loðmundarfirði, stærsta varpi Íslands, að sögn Rögnu.

Ólafur Aðalsteinsson, æðarbóndi í Loðmundarfirði.Stöð 2/Egill Aðalsteinsson.
Æðarbóndinn Ólafur Aðalsteinsson fagnar því að fá vinnuna í heimabyggð. 

„Þetta var alveg óskastaða að þetta kæmi, að það væri hægt að fullvinna dúninn, í stað þess að senda þetta til útlanda eins og hverja aðra hrávöru,“ segir Ólafur á Sævarenda. 

Sjá einnig: Sauma silkisængur fyrir ríka útlendinga

Frá Borgarfirði eystra.Stöð 2/Egill Aðalsteinsson.
Ástrós dóttir Rögnu er flutt úr borginni austur á Borgarfjörð til að vinna í dúninum með öðru. 

„Núna er ég komin með tvær vinnur hérna.“ 

-Hvernig líst þér á þig hérna? 

„Mjög vel. Þetta er bara frábær staður,“ svarar Ástrós Bergsveinsdóttir.

Hér má sjá frétt Stöðvar 2:


Tengdar fréttir

Búkollustjórinn Dóra einn af gleðigjöfum Borgfirðinga

Gleði ríkir meðal Borgfirðinga eystra að sjá loksins fyrir endann á uppbyggingu þjóðvegarins yfir til Héraðsflóa eftir áratugabaráttu. Liðlega tvítug stúlka er í hópi þeirra sem annast vegagerðina.

Japanskir dúnkaupmenn skoða gersemar

Æðarbændur vonast til að góðæri haldist í greininni og þeir fái áfram hátt verð fyrir dúninn, þrátt fyrir kreppu í kaupendahópi ríka fólksins í heiminum, og binda vonir við komu tíu japanskra dúnkaupmanna til Íslands um helgina.

Sauma silkisængur fyrir ríka útlendinga

Verð á æðardúni er í methæðum og söluhorfur hafa aldrei verið betri. Á Skarði á Skarðsströnd eru æðarbændur byrjaðir að fullvinna fokdýrar silkisængur fyrir auðmenn úti í heimi. Talið er að um þrjúhundruð og tuttugu íslensk heimili hafi hlunnindi af dúntekju. Æðarbændur búa sig þessa dagana undir að varp æðarfugls hefjist. Hilmar Jón Kristinsson, æðarræktandi á Skarði, segir í samtali á Stöð 2 að eins og staðan sé nú, séu horfur góður, bæði hvað veður og fjölda fugla snerti. Mikið virðist af æðarfugli, að minnsta kosti við Breiðafjörð. Þegar hort er yfir landið skyggir þó eitt á; snjóþyngsli á Norðurlandi, og vonast Hilmar til að snjóa fari þar að leysa svo fuglinn geti farið að setjast upp og verpa fyrir norðan. "Söluhorfur líta vel út, og verð jafnframt líka, og eiginlega aldrei litið betur út en núna. Vonandi gengur það bara allt eftir," segir Hilmar. Á Skarði er ein stærsta dúnhreinsun landsins og þar er búið að endurnýja tækjakost til að koma á fullvinnslu. Dúnþvottavélar, sængurfyllingarvél og saumavél eru meðal nýrra tækja sem gerir Skarðsverjum kleift að sauma silkisængurnar sjálfir í stað þess að flytja allan dúninn út sem hráefni. Þórunn Hilmarsdóttir, húsfreyja á Skarði, móðir Hilmars, segir að þetta hafi alltaf verið draumurinn, að fullvinnslan færist inn í hagkerfi Íslands. Um 170 þúsund krónur fást nú fyrir kílóið af dún enda er æðardúnssæng vara ríka fólksins. "Það eru ekki til betri sængur. Sá sem hefur einu sinni sofið undir svona sæng, hann vill ekkert annað," segir Þórunn.

Þéttasta æðarvarpið gæti verið á Bíldudal

Ein dýrasta útflutningsvara Íslendinga er æðardúnn en um 200 þúsund krónur fengust fyrir kílóið í fyrra. Æðarvarp er nýtt sem hlunnindi á um 400 jörðum á Íslandi.

Samþykktu sameininguna með afgerandi hætti

Kosið var um sameiningu Borgarfjarðarhrepps, Djúpavogshrepps, Fljótsdalshéraðs og Seyðisfjarðarkaupstaðar í dag. Sameiningin var samþykkt í öllum sveitarfélögunum fjórum með allt frá 64 til 93% atkvæða.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.