Körfubolti

Jón Axel er á hinum sögufræga Naismith lista

Óskar Ófeigur Jónsson skrifar
Jón Axel Guðmundsson í leik með Davidson.
Jón Axel Guðmundsson í leik með Davidson. Getty/Mitchell Layton

Grindvíkingurinn Jón Axel Guðmundsson er á listanum yfir þá fimmtíu sem menn eiga að fylgjast með í Bandaríkjunum í vetur

Íslenski landsliðsmaðurinn Jón Axel Guðmundsson er á Naismith listanum fyrir komandi tímabil í bandaríska háskólakörfuboltanum en þar eru samankomnir þeir fimmtíu leikmenn sem eru bundnar mestar væntingar til í vetur.

Jón Axel er að hefja sitt fjórða og síðasta ár með Davidson háskólanum en hann hefur slegið í gegn með frammistöðu sinni undanfarin tímabil.

Það er ljóst að bakvarðarsveit Davidson liðsins ætti að vera í fínu lagi í vetur því félagi Jóns Axels, Kellan Grady, er einnig á fyrrnefndum Naismith lista.



Naismith verðlaunin eru sögufræg og eftirsótt. Það er líka mikill heiður að vera tilnefndur til þeirrra. Í byrjun febrúar verður síðan gefinn út 30 manna listi og undir lok tímabilsins verða fyrst tíu menn tilnefndir og á endanum koma fjórir leikmenn til greina sem leikmaður ársins.

Um leið og leikmenn eru settir á Naismith listann fyrir tímabil þá kemur pressa á að standa sig. Það verður ekki auðvelt fyrir Jón Axel að fylgja eftir mögnuðu tímabili sínu í fyrra.

Jón Axel var þá með 16,9 stig, 7,3 fráköst og 4,8 stoðsendingar að meðaltali í leik og var inn á topp sjö í öllum tölfræðiþáttunum þremur í Atlantic 10 deildinni.

Jón Axel skráði sig í nýliðavali NBA-deildarinnar og æfði hjá nokkrum félögum en meiðsli komu í veg fyrir að hann héldi því áfram. Jón ákvað því að draga sig út og spila lokaárið sitt með Davidson.

Jón Axel sýndi það í landsleikjunum í haust að hann er kominn í hóp bestu körfuboltamanna landsins og það munu örugglega margir fylgjast með honum í leikjum með Davidson í vetur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.