Verður fyrsta konan til að gegna em­bætti for­sætis­ráð­herra Belgíu

Sophie Wilmes hefur verið skipuð forsætisráðherra Belgíu til bráðabirgða og verður hún fyrsta konan til að gegna embættinu. Landið hefur verið án meirihlutastjórnar síðan í desember á síðasta ári.

Filippus Belgíukonungur greindi frá skipuninni í gær. Wilmes tekur við stöðunni af Charles Michel sem mun taka við embætti forseta leiðtogaráðs ESB af Pólverjanum Donald Tusk í desember. Sophie Wilmes hefur verið ráðherra fjárlaga síðustu árin.

Hin 44 ára Wilmes er frjálslynd og frönskumælandi, en hún kemur úr röðum flokksins MR, flokki Michel.

Ríkisstjórn Michel missti meirihluta sinn í desember og fóru þingkosningar fram í maí síðastliðinn. Enn hefur þó ekki tekist að mynda nýja stjórn og hefur Michel stýrt starfsstjórn síðasta tæpa árið.

Þetta er ekki fyrsta sinn sem stjórnarmyndunarviðræður dragast á langinn í Belgíu, en árið 2010 var mynduð stjórn eftir 541 daga viðræður.