Bandaríski ljósmyndarinn Benedict Evans fékk það verkefni að taka nektarmyndirnar af íslensku CrossFit drottningunni Katrínu Tönju Davíðsdóttur sem birtast í ESPN Body Issue sem kemur út á morgun.

Vísir sagði frá og vísaði á myndirnar í gær og Katrín Tanja birti líka eina af þeim á Instagram síðu sinni. Þar segir hún jafnframt frá því að umræddur Benedict Evans hafi tekið þessar stórglæsilegu myndir í náttúru Íslands.

Benedict Evans og Katrín Tanja eru bæði ánægð með útkomuna og mega líka vera það. Evans segir líka aðeins frá myndatökunni á Íslandi í Instagram færslu sinni.

„Íslenski heimsmeistarinn í CrossFit, Katrín Davíðsdóttir, sést hér á forsíðu ESPN Body Issue fyrir árið 2019. Þetta er líka síðasta prentaða útgáfan af þessu blaði sem gerir hana mjög sérstaka,“ skrifaði Benedict Evans en lét um leið vita að Body Issue verður ekki lagt niður heldur mun það birtast á netinu í framtíðinni.

Hér fyrir neðan er myndband um myndatökuna af Katrínu Tönju út í náttúru Íslands.



„Ég er svo þakklátur fyrir að vera hluti af ljósmyndaraliði ESPN og að hafa fengið að fara í öll þessi mögnuðu verkefni út um allan heim á síðustu árum sem og að hafa fengið að vera með myndirnar mínar á síðum og forsíðum blaðsins. Ekki síst fyrir þessa ógleymanlegu ferð til Íslands, fallegu forsíðu myndina og allar þrettán síðurnar inn í blaðinu,“ skrifaði Benedict Evans.

„Þessar myndir af Katrínu voru teknar á suðurhluta Íslands og þetta var þriggja og hálfs dags ferð hjá okkur. Ég held að ég hafi náð að sofa samtals í einn og hálfan tíma og ég held að starfsmennirnir mínir hafi ekki sofið mikið meira en það,“ sagði Benedict Evans.

„Þakkir til allra sem tóku þátt í þessari myndatölu því þeir lögðu allir aukalega á sig til að ná ýmsu í gegn. Ég vil líka óska Katrínu til hamingju með að vera fyrsti CrossFit íþróttamaðurinn sem kemst í ESPN Body Issue. Ekki klikka á því að kaupa blaðið þegar það kemur í búðirnar á föstudaginn,“ skrifaði Benedict Evans. Það má sjá færsluna hans hér fyrir neðan.