Menning

Gefur tekjur sínar af sýningunni

Kristinn Haukur Guðnason skrifar
Gísli Örn Garðarsson fer með hlutverk í Ég hleyp.
Gísli Örn Garðarsson fer með hlutverk í Ég hleyp. Fréttablaðið/Ernir

Leikarinn Gísli Örn Garðarsson ætlar að gefa allar tekjur sínar af leiksýningunni Ég hleyp, sem sýnd verður næsta vor í Borgarleikhúsinu, til góðgerðarmála. Ég hleyp er danskt leikrit byggt á sannri sögu um barnsmissi. Gísli Örn hafði sjálfur frumkvæði að uppsetningunni ásamt Kristínu Eysteinsdóttur leikhússtjóra.

„Þetta er saga um danskan blaðamann sem missir dóttur sína. Sex tímum eftir að hún er látin var hann farinn út að hlaupa, eitthvað sem hann hafði aldrei gert áður,“ segir Gísli Örn. „Þetta verður áskorun, bæði af því að viðfangsefnið er viðkvæmt og af því að þetta er líkamlega erfitt eins og við Baldvin Z leikstjóri ætlum að vinna þetta.“

Allar tekjur Gísla Arnar af leikritinu munu renna til samtakanna Nýrrar dögunar, Bergsins, Ljónshjarta og Dropans. „Mér fannst ekki rétt að þiggja laun við að leika þetta efni og fara í þetta ferðalag, svo við Kristín fundum útfærslu á þessu þar sem niðurstaðan er þessi. Það sem hefði komið í minn hlut mun renna til þessara samtaka,“ segir hann.

Gísli Örn mun hlaupa á bilinu 10 til 12 kílómetra á hverri sýningu og því er ekki seinna vænna að hefja æfingar. „Ég tók 10 kílómetra í Reykjavíkurmaraþoninu og er að bíða eftir að hnén jafni sig svo ég geti byrjað aftur að æfa á skynsamlegum hraða.“ 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.