Ragnar Kjartansson hlýtur finnsku Ars Fennica verðlaunin

Listamaðurinn Ragnar Kjartansson hlaut í dag hin virtu finnsku Ars Fennica verðlaunin við hátíðlega athöfn í Amos Rex safninu í Helsinki, höfuðborg landsins.

Sjóðurinn veitir verðlaunin annað hvert ár til myndlistarmanns sem þykir hafa skarað fram úr og eru verðlaunin 40.000 evrur. Aðeins einn Íslendingur, Hreinn Friðfinnsson, hefur hlotið verðlaunin áður.

Ars Fennica sjóðurinn var stofnaður af hjónunum Henna og Pertti Niemistö árið 1990. Markmið sjóðsins er að örva listsköpun, skapa alþjóðleg tengsl í heimi myndlistar og vekja áhuga almennings á listum.

Í ár valdi Roland Wetzel, safnvörður Tinguely safnsins í Basel í Sviss, vinningshafann fyrir hönd sjóðsins.

Ragnar þarf vart að kynna en hann fæddist í Reykjavík árið 1976 og býr þar og starfar. Hann útskrifaðist úr Listaháskóla Íslands árið 2001 og stundaði nám við Konunglegu listaakademíuna í Stokkhólmi árið 2000.

Ragnar hefur haldið ótal einkasýningar víða um heim eins og í New York, Chicago, Peking, Lundúnum, Kaupmannahöfn og París.

Gjörningar, uppákomur og hópsýningar Ragnars spanna margra ára tímabil.

Ragnar kemur úr skapandi fjölskyldu en til gamans má geta að fréttastofa ræddi við Guðrúnu Ásmundsdóttur, leikkonu, leikstjóra og leikskáld móður Ragnars og Sigrúnu Eddu Björnsdóttur, leikkonu síðasta sumar þegar þær hlutu báðar Grímuverðlaun. Í viðtalinu ræddu þær um hina listrænu og líflegu fjölskyldu.