Fótbolti

Fyrstu mörk Kolbeins í rúm þrjú ár: Sérstök tilfinning að skora eftir þennan tíma

Arnar Geir Halldórsson skrifar
Þungu fargi af Kolbeini létt
Þungu fargi af Kolbeini létt vísir/getty

Kolbeinn Sigþórsson stimplaði sig af krafti inn í sænska boltann um helgina þegar hann skoraði tvö mörk í 3-0 sigri AIK á Elfsborg á laugardag.

Síðustu ár hafa verið Kolbeini erfið þar sem meiðsli hafa sett stórt strik í reikninginn og voru þetta fyrstu mörk Kolbeins í félagsliðafótbolta síðan hann skoraði eitt mark fyrir franska félagið Nantes 10.febrúar 2016 í 3-4 sigri á Bordeaux í bikarkeppninni.

Síðasta deildarmark Kolbeins kom skömmu áður, þann 23.janúar 2016, einnig gegn Bordeaux en þá í 2-2 jafntefli í Ligue 1.

Raunar hefur Kolbeinn ekki spilað ýkja marga leiki síðan þá, nema með landsliðinu en Kolbeinn hefur nú komið við sögu í fimm leikjum síðan hann gekk í raðir AIK og var þetta jafnframt hans annar leikur í byrjunarliði.

„Þetta er frábær tilfinning. Ég hef beðið eftir þessu í þrjú ár og þetta hefur ekki verið auðvelt. Um leið og ég skoraði fann ég að það var þess virði að ganga í gegnum þessa erfiðu tíma,“ sagði Kolbeinn í samtali við sænska fjölmiðla eftir leik.

Á meðan þessi markaþurrð Kolbeins hjá félagsliðum hefur staðið yfir hefur hann engu að síður gert fimm landsliðsmörk en Kolbeinn er næstmarkahæsti landsliðsmaður Íslands frá upphafi með 23 mörk í 50 A-landsleikjum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.