Innlent

Sóttu slasaða göngukonu nálægt Hrafntinnuskeri

Vésteinn Örn Pétursson skrifar
Í tilkynningu frá Landsbjörg kemur fram að nokkuð hafi verið um annir hjá þeim björgunarsveitarhópum sem manna hálendisvakt björgunarsveita það sem af er sumri.
Í tilkynningu frá Landsbjörg kemur fram að nokkuð hafi verið um annir hjá þeim björgunarsveitarhópum sem manna hálendisvakt björgunarsveita það sem af er sumri. vísir/vilhelm

Björgunarmenn á hálendisvakt björgunarsveita í Landmannalaugum voru í morgun kallaðir út vegna slasaðrar göngukonu við Hrafntinnusker, fyrsta skálann á Laugavegi ef gengið er milli Landmannalauga og Þórsmerkur. Þetta kemur fram í tilkynningu sem Jónas Guðmundsson, verkefnastjóri slysavarna hjá Landsbjörgu, sendi á fréttastofu nú rétt í þessu.

Samkvæmt þeim upplýsingum sem björgunarsveitum barst í fyrstu var konan illa handarbrotin. Um einni og hálfri klukkustund eftir að útkallið barst voru björgunarmenn komnir í Hrafntinnusker og hófu þá við að búa viðkomandi til flutnings.

Áverkar konunnar reyndust minni en í fyrstu var talið. Þó var um minniháttar beinbrot að ræða. Unnið er að því að flytja konuna í Landmannalaugar en þaðan verður henni komið undir læknishendur.

Annríki vegna göngufólks

Samkvæmt tilkynningunni hefur verið nokkuð mikið um útköll vegna göngumanna hjá hálendisvakt björgunarsveita það sem af er sumri.

Í gær fóru þeir björgunarmenn sem manna hálendisvaktina á Sprengisandi til aðstoðar manni sem var að ganga frá Nýjadal að Drekagili við Öskju. Þar voru tveir ferðalangar saman en annar þeirra var ógöngufær sökum áverka á fæti. Var honum ekið í Nýjadal hvaðan honum var komið til byggða þar sem hann fékk viðeigandi læknisaðstoð. Félagi hans hélt göngunni í Drekagil áfram.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.