Leiðtogar ESB funda enn um arftaka Juncker

Leiðtogar Evrópusambandsins sitja enn á fundum í Brussel í Belgíu þar sem reynt er að finna arftaka Jean Claude Juncker á stóli forseta framkvæmdastjórnar Evrópusambandsins.

Erfiðlega hefur gengið að komast að samkomulagi í málinu og héldu fundahöld áfram nú í morgunsárið eftir að fundað hafði verið fram á nótt.  

Talið er að Donald Tusk forseti Evrópuráðsins leiði hóp manna sem vilja fá Hollendinginn Frans Timmermans í embættið.

Sú tillaga hefur hins vegar mætt harðri andstöðu frá þjóðum í Austur-Evrópu og stjórnmálamönnum á hægri vængnum.