Innlent

Nýjustu systur Heimaeyjar byrja í fjögurra vikna einangrun

Kolbeinn Tumi Daðason skrifar
1600 tonna laugin í Vestmannaeyjum þar sem mjaldrarnir verða í sóttkví í fjórar vikur.
1600 tonna laugin í Vestmannaeyjum þar sem mjaldrarnir verða í sóttkví í fjórar vikur. Vísir/Sighvatur

Mjaldrarnir tveir frá Kína eru væntanlegir síðar í dag á Keflavíkurflugvöll. Áætlað er að flugvélin sem flytur mjaldrana tvo, sem eru systur, lendi á Keflavíkurflugvelli klukkan 14. Matvælastofnun fylgist með velferð hvalanna og smitvörnum við flutning þeirra í ný heimkynni í Vestmannaeyjum.

Mjaldrarnir sem nefnast Litla grá og Litla hvít eiga að baki langt ferðalag frá dýragarðinum Shang Feng Ocean World í Shanghai. Sérútbúnir flutningabílar munu ferja þá frá flugvellinum um Landeyjahöfn til Vestmannaeyja.

Í Eyjum verða hvalirnir settir í einangrun í sérsmíðaðri landlaug þar sem þeir munu dvelja í a.m.k. 4 vikur. Þegar aðlögun þeirra er lokið verða þeir fluttir á afgirtan griðastað í Klettsvík. Hvalirnir voru fangaðir við Rússland fyrir um 10 árum síðan og fluttir í dýragarðinn í Kína en í Vestmannaeyjum munu þeir búa við betri aðstæður sem eru mun líkari náttúrulegum heimkynnum þeirra.

Rúm þrjú ár eru síðan erindi vegna þessa innflutnings barst Matvælastofnun. Á þeim tíma hafa skilyrði til innflutnings verið mótuð m.t.t. heilbrigðis og velferðar dýranna annars vegar og smithættu hins vegar. Var þetta gert í samráði við innlenda og erlenda sérfræðinga.

Innflutningsskilyrði miða m.a. að því að lágmarka smithættu sem fylgir hvölunum og á undanförnum vikum hafa þeir undirgengist ítarlegar sýnatökur, læknisskoðanir auk meðhöndlunar gegn sníkjudýrum. Nú tekur við einangrun þar sem fylgst verður með heilsufari þeirra og atferli með það að markmiði að aðlögun þeirra að nýjum heimkynnum verði fyrst og fremst á forsendum bættrar velferðar.

Mjaldrarnir fljúga nú til landsins. Vísir/HJALTI

Fá griðarstað í Klettsvík

„Við erum tilbúin og spennt að taka á móti mjöldrunum. Við munum reyna að keyra þetta áfram eins hratt og vel og hægt er. Það verður mikil vinna þegar þeir lenda á Keflavíkurflugvelli. Mjaldrarnir ferðast í sérútbúnum tönkum sem þeir fóru í í dýragarðinum í Shanghæ. Þeir eru fluttir úr flugvélinni í tvo sérútbúna vagna á Keflavíkurflugvelli sem munu flytja þá til Ladneyjarhafnar. Hvor mjaldur fyrir sig er um eitt tonn að þyngd. Heildarþyngd á hvorum tank er um 9 tonn. Það verður að skipta um vatn í báðum tönkunum þar sem um eitt til tvö tonn af vatni eru tekin úr þeim og nýtt vatn sett í þá. Mjaldarnir eru í sóttkví og bílarnir fara síðan í sóttkví líka um leið og þeir fara inn í vagnanna,“ segir Sigurjón Ingi Sigurðsson, verkefnastjóri sérverkefnadeildar TVG-Zimsen sem sér um flutninginn á mjöldrunum á Íslandi.

„Við ökum með mjaldrana Suðurstrandarveginn. Við erum með fjögur öryggisstopp á leiðinni þar sem verður stoppað og farið inn og kíkt á mjaldranna. Fyrsta stopp er í Grindavík, annað stopp á Selfossi og við erum síðan með tvo aðra staði sem verður stoppað á ef á þarf að halda á leið til Landeyjarhafnar,“ segir Sigurjón.

Mjaldrarnir verða síðan fluttir um borð í Herjólf sem siglir með þá til Vestmannaeyja. Mjaldrarnir verða fyrst um sinn í sóttkví í stórri laug áður en þær fara í Klettsvíkina sem verður þeirra griða­staður. Vel verðum fylgst með mjöldrunum um borð í vögnunum á leið til Vestmannaeyja.

„Þjálfarar mjaldranna geta verið í talstöðvarsambandi við þá í vögnunum. Það er sérstakt talstöðvar- og myndavélarkerfi í tönkunum og þjálfararnir sitja frammí trykkunum hjá bílstjórununum og fylgjast vel með mjöldrunum. Þetta verður krefjandi en mjög skemmtilegt verkefni og við hlökkum til að taka á móti þeim,“ segir Sigurjón.

Rætt var við Sigurjón í Reykjavík síðdegis á Bylgjunni í gær. Spjallið má heyra að neðan.


Tengdar fréttir

Mjaldrasysturnar fá endanlegan lendingardag

Mjaldrasysturnar Litla-Grá og Litla-Hvít, sem flytja á frá Kína í hvalaathvarf samtakanna Sea life trust við Vestmannaeyjar, munu koma hingað til lands 19. júní.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.