Íslenski boltinn

Pepsi Max mörkin: Gary Martin fer hlæjandi í bankann en hvað er í gangi hjá Val?

Óskar Ófeigur Jónsson skrifar
Kristinn Freyr Sigurðsson fær hér rauða spjaldið í gær fyrir glórulaust brot sitt.
Kristinn Freyr Sigurðsson fær hér rauða spjaldið í gær fyrir glórulaust brot sitt. Vísir/Vilhelm

Pepsi Max mörkin gerðu upp Gary Martin málið og slæma stöðu Valsmanna í Pepsi Max deildinni í þættinum í gær en Valur og enski framherjinn sömdu um starfslok í síðustu viku.

Hörður Magnússon, umsjónarmaður Pepsi Max markanna, hóf umfjöllunina um Val og velti fyrir sér stöðu mála hjá Íslandsmeisturum Vals.

Gary Martin fer hlæjandi í bankann og getur spilað með nýju liði 1. júlí. Það er rétt að staldra við. Hvað er í gangi á Hlíðarenda? Þetta er félag sem keypti átta leikmenn fyrir tímabilið, það eru menn þarna hoknir af reynslu og þetta eru Íslandsmeistarar tveggja síðustu ára. Þeir eru með fjögur stig og ekki búnir að vinna leik á Hlíðarenda. Hvað er í gangi?,“ spurði Hörður Magnússon.

„Eins og aðstoðarþjálfarinn þeirra sagði þá eru þeir í annarri baráttu en þeir bjuggust við eftir að hafa fengið alla þessa leikmenn. Eftir leikinn við FH, sem mér fannst mjög góður leikur hjá þeim, þá taldi ég að Valsliðið væri að koma sér aftur á strik og ætti alveg möguleika á að berjast á toppnum og vinna titilinn aftur. Eftir þennan leik í dag bendir aðstoðarþjálfarinn þeirra réttilega á það að það er fallbarátta fram undan. Þeir þurfa að sætta sig við það,“ sagði Þorvaldur Örlygsson.

„Það er mikið bras og þeir hafa greinilega ekki styrkt sig með nógu góðum leikmönnum. Þetta sýnir okkur kannski mest að knattspyrnan er ekki svona einföld. Það er alveg sama hvernig liðið lítur út á blaði eða hvernig leikmaður lítur vel út á blaði. Þegar þú reynir að smala saman liði og ná í úrslit þá er það ekki eins auðvelt og menn halda,“ sagði Þorvaldur.

„Valur hefur reynt að fara aðra leið í þessu núna og þetta hefur ekki gengið upp. Þeir gera starfslokasamning við Gary Martin. Það er ekki oft sem við sjáum menn gera starfslokasamninga hér heima á Íslandi eftir að hafa gert þriggja ára samning. Þetta er ákvörðun sem þeir taka en það eru ekki mörg félög sem geta það. Ég veit ekki hvort að þetta sé jákvætt eða neikvætt en þeir voru ekki sáttir við manninn,“ sagði Þorvaldur.

Hér fyrir neðan má finna alla umfjöllunina og svarið spurningu Harðar Magnússonar um hvort að þetta sé ekki mesta þrot í langan tíma.

Klippa: Pepsi Max mörkin: Hvað er í gangi á Hlíðarenda?



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.