Innlent

Loftslagssjóður sem Hildur stýrir fær 500 milljónir króna

Stefán Ó. Jónsson skrifar
Hildur Knútsdóttir hefur verið verðlaunuð fyrir ritstörf sín.
Hildur Knútsdóttir hefur verið verðlaunuð fyrir ritstörf sín. Stjórnarráðið

Hildur Knútsdóttir hefur verið skipuð formaður stjórnar loftslagssjóðs, en sjóðnum er ætlað að stuðla að nýsköpun í baráttunni við loftslagsbreytingar. Til þess fær hann um 500 milljónir króna á næstu fimm árum.

Meðlimir stjórnarinnar eru fjórir. Auk fyrrnefndrar Hildar sitja þau Helga Barðadóttir, Snjólaug Ólafsdóttir og Hjálmar Hjálmarsson í stjórn loftslagssjóðsins. Snjólaug situr í stjórninni samkvæmt tilnefningu Nýsköpunarmiðstöðvar Íslands og Hjálmar samkvæmt tilnefningu umhverfisverndarsamtaka.

Eins og getið er á vef Stjórnarráðsins, þar sem greint er frá skipuninni, þá er Hildur rithöfundur sem „hefur látið baráttuna í loftslagsmálum sig miklu varða og er yfirlýstur aðgerðasinni í loftslagsmálum,“ eins og það er orðað. 

Hildur lauk BA gráðu í bókmenntum og skapandi skrifum frá Háskóla Íslands árið 2010. Fyrsta skáldsaga hennar kom út árið 2011 en hún hefur bæði hlotið Fjöruverðlaunin, sem og Íslensku bókmenntaverðlaunin, fyrir verk sín.

Rannís mun annast umsýslu loftslagssjóðsins en samkvæmt frumvarpi um breytingar á loftslagslögum sem nú liggur fyrir Alþingi verður hlutverk sjóðsins að styðja við nýsköpunarverkefni á sviði loftslagsmála. 

„Sjóðurinn á meðal annars að styrkja þróunarstarf og rannsóknir á sviði loftslagsvænnar tækniþróunar og nýsköpunar á Íslandi og verkefni sem lúta að rannsóknum, kynningu og fræðslu um áhrif loftslagsbreytinga,“ segir á vef Stjórnarráðsins og því bætt við að alls verði um 500 milljónum króna varið til sjóðsins á fimm ára tímabili.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.