Viðar Örn skoraði í stórsigri

Viðar Örn Kjartansson var á skotskónum í stórsigri Hammarby á Östersunds í sænsku úrvalsdeildinni í fótbolta í kvöld.

Jeppe Andersen kom heimamönnum í Hammarby yfir strax á þriðju mínútu leiksins áður en Viðar Örn tvöfaldaði forystuna með góðu skoti eftir sendingu inn í teiginn frá Muamer Tankovic.

Heimamenn komu inn öðru marki áður en fyrri hálfleikur var úti og fóru með þægilegt 3-0 forskot inn í hálfleikinn. Tankovic skoraði fjórða mark Hammarby úr vítaspyrnu á 59. mínútu.

Hammarby þurfti að leika einum manni færri síðasta korterið eftir að Simon Sanderberg fékk beint rautt spjald. Það kom þó ekki að sök og leiknum lauk með 4-0 sigri Hammarby.

Þetta var fimmti sigur Hammarby í níu leikjum. Þeir fóru með sigrinum í 17 stig, jafn mikið og Malmö á toppnum en Malmö er með betri markatölu og leik til góða.