Allt undir hjá Martin í kvöld 

Martin Hermannsson verður í eldlínunni með þýska liðinu Alba Berlin þegar liðið fær spænska liðið Valencia í heimsókn í öðrum leik liðanna í úrslitaeinvíginu um Evrópubikarinn í körfubolta karla.

Alba Berlin laut í lægra haldi í fyrsta leiknum en þarf að hafa betur í tveimur leikjum til þess að tryggja sér titilinn og því er ljóst að leikmenn Alba Berlin eru með bakið upp að vegg í þessum leik.

Martin var næst stigahæsti leikmaður þýska liðsins í fyrsta leiknum en hann skoraði 16 stig í leiknum. Fari Alba Berlin með sigur af hólmi í leiknum mætast liðin í hreinum úrslitaleik í Valencia á mánudagskvöldið.

Liðið sem fer með sigur af hólmi í Evrópubikarnum tryggir sér þátttökurétt í Evrópudeildinni á næsta keppnistímabili.