Erlent

Handtóku mann sem átti að hafa flúið til Íslands

Birgir Olgeirsson skrifar
Jay Paul Robinson.
Jay Paul Robinson.

Lögreglan í Bandaríkjunum hefur handtekið karlmann sem grunaður er um að hafa myndað gesti á salerni bókasafns í Colombia. Maðurinn átti að hafa flúið til Íslands til að forðast réttvísina.

Um er að ræða hinn 42 ára gamla Jay Paul Robinson sem var handtekinn í Chicago á sunnudag og færður í fangageymslu lögreglunnar í Boone-sýslu í Missouri-ríki. Hann á yfir höfði sér ákæru fyrir nauðgun og ýmis kynferðisbrot.

Starfsmenn bókasafnsins fundu áðurnefnda myndavél og var lögregla kölluð til. Upptökur úr öryggismyndavélum gáfu í skyn að Robinson væri sökudólgurinn og var hann handtekinn þegar hann kom og reyndi að sækja myndavélina.

Fjölmiðlar ytra hafa rætt við lögreglustjóra Boone-sýslu, Tom O´Sullivan, sem sagðist ekki hafa upplýsingar um það hvernig Robinson var handtekinn.

Robinson var handtekinn 3. ágúst í fyrra en við húsleit fannst myndefni á tölvu hans sem sýndi nauðganir og ýmis kynferðisbrot. Í dómsskjölum segir að efnið sýni Robinson ítrekað byrla konu ólyfjan og nauðga henni.

Í tölvupóstum sem hann sendi á fyrrverandi eiginkonu sína sagðist hann nokkuð viss um að hann ætlaði sér að fara á brott til lengri tíma. Hún sagði rannsakendum að hann væri að starfa erlendis sem verkamaður.

„Ég óttast að þú skiljir ekki hve slæmt þetta á eftir að verða. Ég er að fara að hitta lögfræðing á mánudaginn. Ég er nokkuð viss um að ég sé að fara í burtu til lengri tíma,“ skrifaði Robinson til fyrrverandi eiginkonu sinnar. Hann sagði einnig að ekki væri nokkur leið fyrir hann að taka til baka það sem hann hefði gert en hann muni ekki geta valdið meiri skaða.

Töldu saksóknarar að hann hefði reynt að forðast réttvísina með því að fara úr Bandaríkjunum. Átti hann bókað flug til Íslands 5. ágúst síðastliðinn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.