Aprílspá Siggu Kling – Tvíburarnir: Tryggð skiptir þig ofsalega miklu máli

Elsku Tvíburinn minn, þú ert að vakna til vorsins og sumarið mun svo sannarlega blessa þig, þú ert með svo dásamlega sterka nærveru, getur átt það til að snöggreiðast en ert jafnfljótur að fyrirgefa, svona eins og haföldurnar síbreytilegar og þú þarft svo mikla hreyfingu til þess að nýta lífskraftinn til fullnustu.

Þú átt þér svo marga aðdáendur sem bæði dást að þér í fjarlægð og persónulega og þú átt eftir að sjá þetta betur og betur með hverjum mánuði sem líður, ný tækifæri og gott tímabil er að koma þína leið og hver dagur ætti að verða betri og betri því þú átt eftir að finna þú ert alveg öruggur í umhverfi þínu og átt að nota hæfileika þína til að hafa áhrif á örlög þín til hins ýtrasta.

Það fer þér illa að vera of leiðitamur og láta aðra ráðskast með tilveru þína, svo slepptu því bara, ég um mig, frá mér, til mín er bara allt í lagi fyrir svona dásamlegan Tvíbura eins og þig.

Fólkið í kringum þig mun meta þig jafn mikið og þú metur sjálfan þig og núna er þessi orka að hækka, þú ert sem sagt að fá stöðuhækkun svo lærðu að njóta þess.

Tryggð skiptir þig ofsalega miklu máli og þú átt svo mikla vináttu að rekja til fortíðar sem þú átt eftir að hitta og að einhverju leyti munu þeir hjálpa þér að búa til fallegar breytingar því við erum öll mannfólkið ein heild og það er svo sannarlega góð heild í kringum þig. Þú átt eftir að sjá að fólk mun hvetja þig áfram og aðrir smitast af þessari endalausu lífsgleði sem rennur í blóði þínu. Í ástinni er vítt til veggja og þú elskar af lífi og sál, svo lykillinn að því að ástin gangi upp er einfaldlega að treysta.

Knús og kossar, þín Sigga Kling

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur, Jóhanna Heiðdal lögfræðingur.