Aprílspá Siggu Kling – Ljónið: Þú býrð yfir svo miklu meira flæði og afli

Elsku Ljónið mitt, það er alltaf svo mikið að frétta, það væri allt svo ofboðslega leiðigjarnt ef þú ættir ekki sess og sæti alls staðar í kringum mann. Þér er mikið annt um útlit þitt og líkami þinn endurspeglar þitt andlega ástand, svo elskaðu hann af öllu hjarta.

Þú hefur SVO mikla hæfileika til að elska og gefur þig í ástina eins og enginn sé morgundagurinn, en missir svo allan mátt ef þú færð hana ekki endurgoldna, og alls ekki vera heltekinn af einum né neinum. Þú þarft að skilja að í öllu ertu mátturinn og dýrðin og enginn getur fullkomnað þig nema þú sjálfur, notaðu þann eldmóð og ólgandi kraft til að skapa það sem þú átt skilið og þarft.

Gefðu sjálfum þér áskoranir og gefstu aldrei upp, þú býrð yfir svo miklu meira flæði og afli en þú getur ímyndað þér, þú ert eins og virkjun sem hefur enn ekki verið nýtt til fulls.

Þú skalt elska þær breytingar sem koma til þín og tengjast starfsframa og þú skalt í því upphafi vera með skýr mörk á því hvað þú vilt og hvað ekki og hversu miklum tíma þú vilt eyða í þetta eða hitt. Þú þarft að hafa tíma til að leika þér, slappa af, tengjast náttúrunni því þú þrífst ekki í neinskonar búri eða takmörkunum því þú þarft alveg eins og konungur Ljónanna þitt pláss.

Þú ert líka með eðli kettlingsins sem allir vilja eiga og nostra við svo nýttu þér kæti hans og taktu lífinu ekki of alvarlega því það gerir það svo hundleiðinlegt. Svaraðu illu með góðu og semdu við annað fólk með frið í hjarta því þá mun sjálfstraust þitt eflast. Það er líka svo sannarlega betra að gefa en þiggja og  það er þín stærsta lexía í lífinu, peningar koma og fara, en andartak bara einu sinni.

Knús og kossar, þín Sigga Kling

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco, Ana Mafalda, besta húshjálp í heimi, Sema Erla Serdar, baráttukona, Rósa Ingólfsdóttir, sjónvarpskona, Anton Máni Svansson, kvikmyndaframleiðandi, Hulk.