Kosið á ný í Sjómannafélaginu

Ákveðið hefur verið að fram fari nýjar kosningar í stjórn Sjómannafélags Íslands. Þetta kemur fram í yfirlýsingu á vef Sjómannafélagsins þar sem vísað er til ákvörðunar stjórnar og trúnaðarmannaráðs SÍ.

Eins og Vísir hefur fjallað ítarlega um þá hafði Heiðveig María Einarsdóttir, sjómaður og viðskiptalögfræðingur, hug á að bjóða sig og lista sinn fram til stjórnar. Til þess kom þó ekki því bæði var það mat kjörstjórnar að hún hefði ekki kjörgengi, til þess þyrfti hún að hafa greitt félagsgjöld í þrjú ár og þá var henni vikið úr félaginu að auki. Var þar vísað til meints skaða sem hún var talin af Jónasi Garðarssyni formanni hafa valdið félaginu.

Spjótum beint að Heiðveigu

Bergur Þorkelsson gjaldkeri SÍ var sjálfkjörinn formaður en samkvæmt lögum félagsins stendur til að hann taki við af Jónasi þegar næsti aðalfundur verður haldinn.

Í yfirlýsingunni er þess getið að dómur Félagsdóms hafi gengið á þá leið að óheimilt væri að setja það skilyrði að þeir einir mættu bjóða sig fram sem greitt hafi til félagsins í þrjú ár. Þá er það nefnt einnig að í kjölfarið hafi komið fram áskorun um að efnt yrði til nýrra kosninga, þá til stjórnar, trúnaðarmannaráðs og stjórnar matsveinadeildar félagsins.

„Að mati stjórnar, trúnaðarmannaráðs og lögmanna félagsins, er einsýnt að stefnandi í framangreindu félagsdómsmáli [Heiðveig María] var ekki dæmd inn í félagið á ný með dómi Félagsdóms. Hún hefur hafnað boði um að ganga í félagið á ný,“ segir í yfirlýsingunni. En, fram hefur komið að Heiðveig María lítur svo á að hún hafi aldrei farið úr félaginu.

 

Ný kosning auglýst við fyrsta tækifæri

„Þrátt fyrir að stjórn og trúnaðarmannaráð félagsins telji að úrskurður kjörstjórnar frá 20. nóvember síðastliðinn, um ólögmæti mótframboðs B-lista, standi óhaggaður, vegna annmarka sem á framboðinu voru, hefur stjórn og trúnaðarmannaráð félagsins ákveðið að fram fari á ný kosningar í félaginu, til að hafið sé yfir vafa að frambjóðendur á listum stjórnar félagsins sitji í óumdeildu umboði félagsmanna.“

Í yfirlýsingunni kemur fram að ný kosning verði auglýst í fjölmiðlum og á heimasíðu félagsins við fyrsta tækifæri.

 

Heiðveig ætlar ekki að taka þátt í trékassakosningu

„Eins og þessi yfirlýsing snýr við mér, geri ég mér ekki grein fyrir því hvað felst í því að ég hafi ekki þegið boð um að ganga í félagið aftur? Ég hef alltaf litið svo á að ég sé og hafi verið félagsmaður,“ segir Heiðveig María í samtali við Vísi. Hún segist ítrekað óskað eftir upplýsingum um hver er hennar staða innan félagsins og réttindi eru. En án árangurs.

„Ég hef hins vegar verið að greiða í félagið undanfarna mánuði. Ég fagna því vissulega að þeir ætli að efna til kosninga. Og vona það innilega að þeir gangi þá alla leið til að ná í þetta óumdeilda umboð, sem þeir nefna, með að tryggja að framkvæmd kosninganna verði hafin yfir allan vafa. Ég geri þá ráð fyrir því að þeir séu að svara kalli félagsmanna um að fá óháðan aðila að borðum til að framkvæma kosninguna. Sem síðan verður fylgt eftir með rafrænni atkvæðagreiðslu þar sem öllum félagsmönnum gefst kostur á að kjósa. Aðeins þannig verður umboðið tryggt.“

Spurð hvort hún hyggist ætla að gefa kost á sér á ný, í nýjum kosningum, segist Heiðveig María vera að melta þessa yfirlýsingu.

„Ég skoða það væntanlega að bjóða fram aftur, en ég ætla ekki að taka þátt í einhverri trékassakosningu uppí Skipholti. Óumdeilt er að ég treysti þessum mönnum ekki til að framkvæma slíkt.“