Svona tókst Mueller og félögum að koma í veg fyrir leka úr rannsókninni

Ótrúlegt þykir að lítið sem ekkert hafi lekið í fjölmiðla frá Robert Mueller og sérstöku rannsóknarteymi hans þau tvö ár sem teymi hans hefur rannsakað afskipti Rússa af forsetakosningunum í Bandaríkjunum árið 2016 og mögulegum tengslum við framboðs Donald Trump Bandaríkjaforseta. Ströngum reglum var fylgt til þess að koma í veg fyrir leka.

Mueller skilaði skýrslu sinni til William Barr, dómsmálaráðherra Bandaríkjanna, í gær. Þrátt fyrir að ýmislegt hafi bent til þess undanfarnar vikur að skýrslan væri á lokametrunum kom tilkynning þess efnis að Barr hefði móttekið skýrsluna á óvart. Þá var ekki mikið gert úr því að búið væri að klára skýrsluna, hún var einfaldlega afhent án sérstakrar viðhafnar, að því er kemur fram í frétt Guardian.

Þar kemur fram að eftir tveggja ára starf, fjölda ákæra og fangelsisdóma yfir suma af nánustu ráðgjöfum Bandaríkjaforseta, sé ekki vitað til þess að Mueller né starfsmenn hans hafi lekið einu einasta smáatriði um rannsóknina eða efni skýrslunnar, eitthvað sem verði að teljast óvenjulegt í Washington.

„Við munum ekki tjá okkur“

Starfsemin er jú svo leynileg að aldrei hefur verið gefið út nákvæmlega hvar Mueller og hans teymi hefur verið til húsa í Washington. Þá greinir Guardian frá því að skrifstofa Mueller hafi fengið sérstaka heimild til að tryggja öryggi þeirra gagna sem notast var við í rannsókninni. Því sé líklegt að skref hafi verið tekin til þess að tryggja að utanaðkomandi snjallsímar og önnur raftæki sem tekið gætu upp hljóð og mynd kæmu ekki inn á skrifstofuna.

Þá var þeim sem boðaðir voru til viðtals eða yfirheyrslna á skrifstofunni sagt að mæta á skrifstofu lögfræðinga þeirra, hótel eða nærliggjandi lestarstöðvar. Þaðan voru þeir sóttir af embættismönnum Muller og þeim fylgt hljóðlega inn á skrifstofur Mueller. Eftir viðtalið var þeim skutlað á sama stað og þeir voru sóttir, allt til þess að tryggja það að ekki væri hægt að fylgjast með hverjir kæmu inn og út af skrifstofum Mueller.

Sjá einnig: Hér eru þeir sem Mueller ákærði í Rússarannsókninni

Þá kemur einnig fram í frétt Guardian að blaðamenn í Washington sem alvanir séu og treysti á leka úr stjórnkerfi Bandaríkjanna hafi alfarið verið læstir úti. Enginn starfsmaður Mueller hafi svarað spurningum þeirra og þá hafi talsmaður Mueller, Peter Carr, alfarið neitað að veita blaðamannamönnum aðgang með því að gefa út yfirlýsingar, veita bakgrunnsupplýsingar eða spjalla við þá „off the record“.

„Takk,“ svaraði Carr iðulega fyrirspurnum blaðamanna. „Við munum ekki tjá okkur.“

Sást síðast á almannafæri í Apple-verslun

Þær upplýsingar sem bandarískar fjölmiðlar hafa undir höndum um rannsóknina hafa að mestu komið úr dómskjölum úr þeim fjölmörgu dómsmálum sem Mueller hefur höfðað vegna rannsóknarinnar, sem og upplýsingum frá lögmönnum þeirra sem sætt hafa ákærum frá Mueller.

Raunar hefur Mueller sjálfur farið svo huldu höfði að hann hefur aðeins í tvígang sést á almannafæri frá því að rannsóknin hófst. Í fyrra skiptið í júlí á síðasta ári er hann sást á Reagan flugvellinum í Washington. Það síðara í september er hann sást þiggja aðstoð starfsmanns Apple-verslunar í sömu borg.

William Barr, dómsmálaráðherra, segist jafnvel ætla að kynna þingmönnum helstu niðurstöður skýrslunnar um helgina. Talsmaður embættis sérstaka rannsakandans segir að hann láti af störfum á næstu dögum. Það fellur í skaut Barr að ákveða hvort og hversu mikið af skýrslunni verður gert opinbert.