Örlög WOW geti haft áhrif á viðræður en breyti ekki stöðu félagsmanna VR

Ragnar Þór Ingólfsson, formaður VR, segir óráðin örlög flugfélagsins WOW air, sem berst nú í bökkum við að forða sér frá gjaldþroti, vissulega geta haft áhrif á kjaraviðræður sem nú standa yfir. Hann segir VR verða að vera tilbúið að taka á móti þeim félagsmönnum sem koma til með að missa vinnuna, fari svo að WOW air haldi ekki flugi.

Sáttafundi sex verkalýðsfélaga og Samtaka atvinnulífsins lauk hjá ríkissáttasemjara núna klukkan 13:30. Annar fundur hefur verið boðaður klukkan 10 í fyrramálið.

Fundurinn átti að standa til klukkan 16 í dag en samkvæmt upplýsingum fréttastofu var fundinum slitið fyrr en áætlað var vegna óvissunnar sem uppi er vegna WOW air. Ragnar Þór sagði þó í samtali við fréttastofu fyrr í dag að viðræðum hafi verið frestað af margvíslegum ástæðum, þó staða WOW hafi vissulega spilað þar inn í.

Ragnar Þór var gestur Reykjavíkur síðdegis á Bylgjunni í dag þar sem hann fór yfir stöðuna.

„Hún getur svo sannarlega haft áhrif en breytir ekki þeirri stöðu sem okkar félagsmenn eru í, að krafa okkar um að fólk geti lifað með mannlegri reis á dagvinnulaunum sé haldið til haga og sömuleiðis að hér verði kerfisbreytingar til að bæta kjör almennings til bæði lengri og skemmri tíma með aðgerðum meðal annars í húsnæðismálum og varðandi vexti og verðtryggingu,“ segir Ragnar Þór.

Áhrif mögulegs gjaldþrots WOW á hagkerfið stór þáttur

Aðspurður hvernig niðurstaða í máli WOW gæti haft áhrif á áframhaldandi viðræður sagði hann þá svörtu mynd sem máluð hefði verið upp af hagkerfinu, færi WOW í gjaldþrot, spila stórt hlutverk.

„Meðal annars að hér fari verðbólga í allt að sex prósent. Það mun kosta það einfaldlega að skuldir heimilanna munu hækka um hundruð milljarða á nánast einum vettvangi og það er eitthvað sem við í verkalýðshreyfingunni munum ekki sætta okkur að við að hér komi slíkur skellur í heimilisbókhaldið, að hér hækki skuldir upp úr öllu valdi út af því að eitt fyrirtæki fellur,“ segir Ragnar Þór.

Hann bætir því við að ef til þess komi að hagkerfið taki stóran skell vegna falls WOW, verði verkalýðsfélögin einfaldlega að skerpa á kröfugerð sinni gagnvart stjórnvöldum. Tryggja verði að mótaðili viðræðnanna, lánveitandinn, „taki álíka mikla ábyrgð og skell eins og heimilin hafa ávallt verið látin gera,“ þegar aðstæður sem þær sem nú eru uppi hjá WOW koma til.

Ragnar Þór segir mögulegt að verkalýðsfélögin gerist nauðbeygð til þess að breyta kröfugerð sinni til þess að mæta þeim aðstæðum sem skapast gætu vegna mögulegs falls WOW.

„En þetta eru í raun hlutir sem að við erum bara í þessum töluðum orðum að funda um og ræða mögulegar lausnir og viðbrögð við þeirri stöðu sem upp getur komið. Hitt  er annað mál að það hefur líka komið fram í umræðunni að áhrifin verði óveruleg,“ segir Ragnar.

Verða að geta tekið á móti félagsmönnum sem misst gætu vinnuna

Hann segir mikilvægt að VR verði í stakk búið til þess að taka á móti þeim félagsmönnum sínum sem fall WOW air hefði áhrif á með beinum hætti, það er, starfsfólk félagsins.

„Það er að mörgu að huga í þessu, ekki bara áhrif á hagkerfið eða lífskjör almennings til skemmri og lengri tíma heldur líka það sem er að gerast beint fyrir kjör starfsfólks sem að missir þarna vinnu.“

Að lokum sagði Ragnar það ekki hafa verið að frumkvæði stéttarfélaganna sem viðræðum var slegið á frest.

„Að er í sjálfu sér ekki að okkar frumkvæði sem við erum að fresta þessum fundi. Fyrst og fremst kannski að okkar viðsemjendur hafa ekki viljað ræða launaliðinn meðan þessi óvissa er. Meðan við getum ekki rætt launaliðinn og höfum engar forsendur til að taka afstöðu til áframhaldandi viðræðna þá er bara þessi óvissa uppi og við vonum að hún eyðist sem allra fyrst þannig að við getum brett upp ermar og klárað þetta.“