Borgin borgar áhrifavöldum hálfa milljón fyrir að tala um Hverfið mitt

Þrír áhrifavaldar hafa verið ráðnir til þess af borgaryfirvöldum til að auglýsa sérstaklega verkefnið „hverfið mitt“. Borgin ver sjö milljónum í kynningu á verkefninu vorið 2019 og þar af fara 500 þúsund til áhrifavaldanna svokallaðra. En, þar er um að ræða fólk sem hefur vakið verulega athygli á samfélagsmiðlum svo sem Facebook, Twitter, Instagram, SnapChat og/eða YouTube.

Aronmola, Gveiga og Aldís Björk

Þeir áhrifavaldar sem borgin er með á sínum snærum eru Aronmola eða Aron Már Ólafsson, Gveiga eða Guðrún Veiga og Aldís Björk. Aronmola er á Instagram og hinar tvær eru bæði á Instagram og Snapchat. Þátttaka þeirra hófst við upphaf herferðarinnar og lýkur ekki fyrr en við lok herferðar. Hvernig þau bera sig að við það er erfitt að segja, því myndskeið á Instagram og Snapchat hverfa eftir að hafa verið 24 stundir í birtingu.

„Þetta er sem sagt fólk sem auglýsingastofan Hvíta húsið finnur og semur við og er hluti af auglýsingaherferðinni um hugmyndasöfnun í íbúalýðræðisverkefninu Hverfið mitt,“ segir Bjarni Brynjólfsson upplýsingastjóri Reykjavíkurborgar.

Bjarni segir að notkun á samfélagsmiðlum þar á meðal snapchat er vel ígrunduð aðferð til að ná til íbúa í hverfum borgarinnar og er stefnufest í upplýsingastefnu borgarinnar þar sem segir m.a. að borgin skuli nýta sér samfélagsmiðla. Bjarni bendir á að þetta megi sjá í 5. grein stefnunnar.

Umdeildir áhrifavaldar

Hinir svokölluðu áhrifavaldar hafa í gegnum tíðina verið umdeild fyrirbæri. Skattayfirvöld hafa haft auga með þeim og þá hefur Neytendastofa haft afskipti af áhrifavöldunum og bannað þeim að birta duldar auglýsingar. Enda stríðir það gegn lögum. Gera verður skýran greinarmun á auglýsingum og öðru efni.

Þá hefur Björn Leví Gunnarsson, þingmaður Pírata, lagt fram fyrirspurnir sem hann beinir til allra ráðuneyta landsins þar sem hann hefur óskað eftir upplýsingum um hversu miklu fé ráðuneytin og stofnanir á þeirra vegum verja til auglýsinga á samfélagsmiðlum. Hann veltir fyrir sér samfélagslegri ábyrgð; að opinberir aðilar beini auglýsingafé sínu í hinar alþjóðlegu veitur í stað þess að auglýsa í fjölmiðlum landsins sem berjast í bökkum, en starfa samkvæmt siðareglum blaðamanna. Hvort það í sjálfu sér sé hugsanlega til marks um firringu opinberra stofnana gagnvart stöðu sinni?