Jón Axel svalur á vítalínunni undir lokin

Jón Axel Guðmundsson var stigahæstur í liði Davidson sem vann fjögurra stiga sigur á Richmond, 69-73, í lokaleik sínum í A10-deild bandaríska háskólakörfuboltans í nótt.

Grindvíkingurinn skoraði 22 stig í leiknum. Hann tók auk þess níu fráköst, gaf fjórar stoðsendingar og stal boltanum þrisvar sinnum.

Jón Axel sýndi mikið öryggi á vítalínunni undir lokin. Á síðustu 32 sekúndum leiksins setti hann niður fimm af sex vítaskotum sínum og hjálpaði Davidson að halda forystunni.

Þetta var þriðji sigur Villikattanna í röð. Jón Axel og félagar enduðu í 2. sæti A10-deildarinnar með 23 sigra og átta töp.

Síðar í vikunni hefst úrslitakeppni A10-deildarinnar þar sem Davidson mætir annað hvort Duquesne eða Saint Joseph's.