Martin frábær í sigri Alba

Martin Hermannsson var á meðal stigahæstu manna í sigri Alba Berlín á Fraport Skyliners í þýsku Bundesligunni í körfubolta í kvöld.

Martin gerði sextán stig fyrir Berlín sem vann leikinn 99-86. Hann var einnig með fjórar stoðsendingar á liðsfélaga sína og eitt frákast.

Gestirnir í Alba byrjuðu leikinn betur en heimamenn tóku forystuna og leiddu mestan hluta fyrri hálfleiks. Staðan var þó 42-45 fyrir gestina í hálfleik.

Í þriðja leikhluta bættu gestirnir í og unnu að lokum nokkuð þægilegan sigur.

Á Spáni spilaði Tryggvi Snær Hlinason rúmar 11 mínútur og skoraði fjögur stig þegar Monbus Obradoiro vann nauman 75-73 sigur á Candelas Breogan.