Erlent

Vildu ekki yfirgefa kalífadæmið

Samúel Karl Ólason skrifar
SDF-liði stendur vörð um menn frá Baghouz.
SDF-liði stendur vörð um menn frá Baghouz. AP/Felipe Dana

Margir þeirra íbúa sem flúið hafa leifar Kalífadæmis Íslamska ríkisins segjast enn hliðhollir hryðjuverkasamtökunum og þau hafi eingöngu flúið eftir að trúarleiðtogar eða leiðtogar ISIS hafi skipað þeim að flýja. Þrátt fyrir að mörg þeirra hafi búið í holum í jörðinni og ekki haft aðgang að lyfjum, mat og öðrum nauðsynjum, segjast þau viss um að Íslamska ríkið muni rísa á nýjan leik.

Sýrlenskir Kúrdar og bandamenn þeir í regnhlífarsamtökunum Syrian Democratic Forces, SDF, sitja nú um leifar kalífadæmisins sem leiðtogar ISIS sögðu að myndi teygja anga sína alla leið til Rómar. Einungis hálfur ferkílómetri í bænum Baghouz er eftir af kalífadæminu sem náði þegar mest var yfir þriðjung Írak og Sýrlands.

Samkvæmt AP fréttaveitunni er áætlað að um 20 þúsund almennir borgarar hafi yfirgefið yfirráðasvæði ISIS á undanförnum vikum, þar til þeir ISIS-liðar sem eftir eru lokuðu síðustu flóttaleið borgaranna. Vika leið og enginn yfirgaf svæðið þar til á miðvikudaginn þegar stórum hópi fólks var gert kleift að fara.

Þar á meðal voru fjölskyldur vígamanna. Blaðamaður AP sagði fólkið meðal annars vera frá Frakklandi, Póllandi, Kína, Egyptalandi og Marokkó. Þar voru einnig minnst ellefu börn sem tilheyra Jasídum. Vígamenn ISIS rændu þúsundum Jasída í Írak árið 2014 og er fjölmargra enn saknað.

Ein fjórtán ára stúlka sem rætt var við var ekki á þeirri skoðun að Íslamska ríkið væri liðið.

„Hver sagði það? Hvert sem þú ferð, þar er Íslamska ríkið.“

Blaðamðurinn ræddi við á annan tug manns og af þeim sögðust einungis fjórir hafa viljað yfirgefa Baghouz.

Talið er að um 300 vígamenn haldi síðasta yfirráðasvæði ISIS. Flestir eru þeir sagðir vera erlendir vígamann samtakanna. Vígamenn frá Írak og Sýrlandi eru sagðir hafa komið sér fyrir á milli almennra borgara og vera í felum. Talið er að mörgum hafi tekið að komast til Írak. Jafnvel þó dagar Kalífadæmisins séu taldir þykir ljóst að ógn stafi enn af hryðjuverkasamtökunum.

Sjá einnig: ISIS-liðar sýna mátt sinn í Írak

Menn sem flúið hafa frá yfirráðasvæði ISIS eru aðskildir frá konum og börnum og kanna SDF hvort að um vígamenn sé að ræða. Séu þeir vígamenn eru þeir sendir í fangabúðir, annars eru þeir sendir með konunum og börnunum til búða í norðurhluta Sýrlands.

Þessar búðir eru yfirfullar og hafa minnst 60 manns dáið úr næringarskorti eða af öðrum ástæðum. Sameinuðu þjóðirnar hafa kallað eftir alþjóðlegri hjálp þar sem Kúrdar hafa ekki burði til að útvega öllum íbúum búðanna þær birgðir sem eru nauðsynlegar. AFP fréttaveitan segir að flestir hinna látnu séu ungabörn.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.