Hætti við Coachella eftir að skipuleggjendur neituðu að byggja hvelfingu

Rapparinn Kanye West hætti við að koma fram á tónlistarhátíðinni Coachella eftir að skipuleggjendur hátíðarinnar sáu ekki fram á að geta byggt gríðarstóra hvelfingu fyrir rapparann. Hvelfingin sem rapparinn bað um var svo stór að þörf væri á að endurskipuleggja allt hátíðarsvæðið upp á nýtt.

West átti að koma fram á aðalsviði hátíðarinnar og stefndu tónleikahaldarar á að tilkynna komu rapparans á hátíðina þann 3. janúar. Tveimur dögum fyrir umrædda tilkynningu fór West fram á að gríðarstór hvelfing yrði byggð á miðju hátíðarsvæði þar sem hann kæmi fram. 

Skipuleggjendur hátíðarinnar tilkynntu West að hvelfingin væri ekki gerleg á fjórum mánuðum og henni myndu fylgja miklar breytingar sem hefðu áhrif á hátíðargesti, til að mynda þyrfti að fjarlæga fjölmörg klósett á svæðinu. 

Samkvæmt heimildum Hollywood Reporter tók rapparinn ekki vel í þessar útskýringar skipuleggjenda og sagði það vera á byrgð skipuleggjenda að finna út úr því vandamáli. Hann væri listamaður með ákveðna sýn og hann ætti ekki að eyða tíma sínum í að ræða ferðakamra. 

Hvelfingin sem um ræðir átti að rúma 125 þúsund manns þar sem sviðið væri staðsett fyrir miðju. Mikill tæknibúnaður fylgdi hugmynd rapparans og átti hönnunin að vera í höndum John McGuire sem hefur starfað sem sviðshönnuður hans. 

Samkvæmt heimildum Hollywood Reporter höfðu skipuleggjendur unnið að því að fá West á hátíðina í fleiri ár. Eftir forföll hans var söngkonan Ariana Grande fengin í hans stað og verður hún stærsta nafn hátíðarinnar í ár.