Jón Axel atkvæðamikill í sigri Davidson

Jón Axel Guðmundsson var í eldlínunni í bandaríska háskólaboltanum í körfubolta í nótt þegar hann og félagar hans í Davidson skólanum fengu Duquesne Dukes í heimsókn.

Jón Axel spilaði manna mest á vellinum eða 39 mínútur og hjálpaði liði sínu að innbyrða fjögurra stiga sigur, 65-61.

Hann skoraði 12 stig, tók 5 fráköst og gaf 6 stoðsendingar en þriggja stiga skotin voru ekki að detta hjá Jóni Axeli í nótt þar sem hann klikkaði á öllum fjórum þriggja stiga tilraunum sínum í leiknum.

Jón og félagar hafa unnið tíu leiki í vetur en tapað fjórum. Þeir eru taplausir á heimavelli í sjö leikjum.