Aprílspá Siggu Kling – Sporðdrekinn: Potar of oft í þig með hala Sporðdrekans

Elsku Sporðdrekinn minn, þú þarft að hleypa ótemjunni í þér betur út, leyfa þér að vera svolítið allskonar. Hjarta þitt hefur of oft komið þér í klípu, því þó þú hafir áberandi styrk þá fylgir honum þessi mikla og logandi viðkvæmni.

Lífsstígur þinn verður samsettur af svo rosalegum tilfinningastiga að þú ert eins og sinfónía eftir Beethoven, maður veit aldrei hvaða tilfinning kemur næst. Þú ert að raða þér saman eins og tónverk svo skoðaðu mjög vel núna hvað ER aðalatriðið?

Þú hefur allt sem þú þarft til að vera hamingjusamur, en potar of oft í þig með hala Sporðdrekans sem spýtir eitri og hindrar þú sjáir þú ert í raun á beinum og breiðum vegi. Sættu þig við að hafa gert mistök, því mistök gera þig að alvöru manneskju og þá skilurðu betur aðra og með því að skilja aðra betur skilurðu líka sjálfan þig.

Þú ert manneskja visku og innsæis en getur orðið svo skelfingu lostinn ef lífið verður of hversdagslegt. Í því tímabili sem þú ert að fara inn í eru undirbúnir flutningar eða breytingar sem gefa þér alla þá næringu sem þú þarfnast, ekki gefa þér tíma til að velta þér upp úr hversdagsvitleysu, þú ert að stíga stórt skref í þína þágu og í því fylgja allskonar skemmtilegar pælingar sem þú getur beint huga þínum að og gefið lífi þínu liti regnbogans.

Þú átt að setja markið hátt því þér er ætlað að ná langt á þeirri braut sem þú kýst þér, ekki láta blaðrið í samfélaginu segja þér hvað er rétt og hvað er rangt, því sjáðu þér mætir velgengni um leið og þú getur sagt það upphátt og meint það: Mér er skítsama um hvað aðrir hugsa „I did it my way“.

Knús og kossar, þín Sigga Kling

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving, Steingrímur Sævarr Ólafsson fjölmiðlaráðgjafi, Guðný Hrefna Sverrisdóttir, flugfreyja og gourmé kokkur, Hörður Ágústsson Macland snillingur, Indira Gandhi, Guðrún Ásmundsdóttir og Calvin Klein.