Páfinn segir Guð elska alla menn

Frans Páfi predikaði í miðnæturmessu í nótt þar sem fæðingu Jesú var fagnað. Messan fór fram í Péturskirkjunni í Vatíkaninu. Megininntak ræðu páfans var að Guð elskaði alla menn, jafnvel þá verstu.

„Þú getur haft rangar hugmyndir, þú getur hafa skapað vandræði í lífi þínu… en Guð heldur áfram að elska þig,“ sagði páfinn í predikun sinni. Hann ítrekaði að ást Guðs væri skilyrðislaus.

Einhverjir hafa sett þessi orð páfans í samhengi við hneykslismál sem hafa komið upp innan kirkjunnar, þá sérstaklega kynferðisbrot kirkjunnar manna.

Á meðal þeirra sem voru viðstaddir messuna voru börn frá Venesúela, Írak og Úganda sem var sérstaklega boðið. Á vef BBC segir að þetta megi túlka sem skýr skilaboð frá páfanum um að aðstoða flóttafólk og fólk í neyð.