Tottenham úr leik eftir tap gegn D-deildarliði

Átta leikir fóru fram í 3.umferð enska deildabikarsins í kvöld og áttu úrvalsdeildarliðin í mismiklum vandræðum með lið úr neðri deildum.

Gylfi Þór Sigurðsson lék síðasta korterið fyrir Everton sem vann 0-2 sigur á Sheffield Wednesday þar sem Dominic Calvert Lewin gerði bæði mörk Everton snemma leiks.

Englandsmeistarar Manchester City áttu ekki í nokkrum vandræðum með Preston North End og lögðu lærisveinar Pep Guardiola grunninn að sigrinum í fyrri hálfleik þar sem Raheem Sterling og Gabriel Jesus voru á skotskónum.

Tottenham hins vegar lenti í miklum vandræðum gegn D-deildarliði Colchester United þar sem liðin gerðu markalaust jafntefli í venjulegum leiktíma. Colchester vann svo vítaspyrnukeppnina þar sem Christian Eriksen og Lucas Moura klúðruðu sínum spyrnum.

Colchester vann Crystal Palace í 2.umferð deildabikarsins. Alvöru bikarævintýri.

Tottenham þar með eina úrvalsdeildarliðið sem féll úr leik í kvöld en 3.umferðin heldur áfram annað kvöld.

Úrslit kvöldsins



Arsenal 5-0 Nottingham Forest

Colchester 0-0 Tottenham (Colchester vann eftir vítaspyrnukeppni)

Crawley 1-1 Stoke (Crawley vann eftir vítaspyrnukeppni)

Luton 0-4 Leicester

Portsmouth 0-4 Southampton

Preston 0-3 Man. City

Sheffield Wednesday 0-2 Everton

Watford 2-1 Swansea