Gæti snjóað á sumardaginn fyrsta

Austan- og suðaustanáttir munu ráða ríkjum á landinu næstu daga ef marka má spákort Veðurstofunnar. Þeim fylgir væta á sunnan- og austanverðu landinu, jafnvel talsvert regn um tíma á Suðausturlandi og Austfjörðum. Það fer að rigna suðaustanlands upp úr hádegi og verða þokubakkar eða súld við austurströndina með kvöldinu.

Annars staðar á landinu verður skýjað með köflum og þurrt að kalla. Ætla má að vindhraðinn verði á bilinu 13 til 18 m/s syðst á landinu en annars staðar hægari vindur. Hitinn verður á bilinu 5 til 13 stig að deginum, hlýjast inn til landsins.

Veðurstofan segir þó að það verði hlýtt í veðri fram yfir helgi, þrátt fyrir að áfram megi búst við næturfrosti í innsveitum á Norður- og Austurlandi.

Að sama skapi útilokar Veðurstofan ekki að köld norðanátt nái að þrengja sér inn Vestfirði og Strandir rétt fyrir sumardaginn fyrsta, fimmtudaginn í næstu viku, og að þá muni snjóa á þeim slóðum. „Frekar kuldaleg sumarkveðja atarna,“ eins og veðurfræðingur kemst að orði.



Veðurhorfur á landinu næstu daga 

Á laugardag:

Suðaustlæg átt, yfirleitt 8-13 m/s og þurrt að kalla á N-landi, en annars rigning með köflum, talsverð úrkoma SA-lands fram undir kvöld. Hiti 4 til 12 stig, hlýjast NV-til. 

Á sunnudag:

Fremur hæg austanátt og bjartviðri dálítil rigning SA-til, en annars bjart með köflum og þurrt að mestu. Bætir í vind S-lands seinni partinn. Hiti víða 5 til 10 stig. 

Á mánudag:

Stíf austanátt með rigningu S- og A-lands, en annars þurrt að kalla og hlýnar heldur í bili. 

Á þriðjudag:

Útlit fyrir hvassa og hlýja austanátt með rigningu í flestum landshlutum, úrhelli SA-til framan af degi. 

Á miðvikudag og fimmtudag (sumardagurinn fyrsti):

Útlit fyrir norðaustanátt með snjókomu eða slyddu og svölu veðri NV-til, en annars S-læg átt, rigning með köflum og milt.