Craig: „Finnur með hugann við verkefnið“

Craig Pedersen, þjálfari íslenska karlalandsliðsins í körfubolta, segir að Finnur Freyr Stefánsson, astoðarlandsliðsþjálfari, sé með fullan hug við landsliðsverkefnin í vikunni, en Finnur íhugar að hætta eins og kom fram í Akraborginni í gær.

Ísland mætir Finnlandi og Tékklandi í Laugardalshöll, annars vegar á föstudag, og hins vegar á sunnudag, en þetta gætu verið síðustu landsleikir Finns sem aðstoðarlandsliðsþjálfara.

„Eins og staðan er núna er Finnur með og er einbeittur. Hann var á æfingu í morgun og við ræddum málin. Hann sagðist vera með allan hugann við verkefnin í vikunni með landsliðinu,” sagði Craig í kvöldfréttum Stöðvar 2.

„Það er frábært við þurfum hans innlegg og pælingar. Hann er með margar góðar hugmyndir og ég virði þær. Við þurfum hann um borð og hann er um borð.”

Mikið hefur verið rætt og ritað um æfingarhelgina sem fór fram um helgina, en Craig segir að liðið þurfi allan sinn fókus á leikina mikilvæga sem framundan eru.

„Við þurfum á hreinskilni að halda við æfingarnar og þannig er það. Sem betur fer get ég ekki lesið mikla íslensku svo ég get ekki séð allt, en við einbeitum okkur að leiknum og að æfingum út vikuna,” sagði Craig.

Fréttina má sjá í heild sinni hér að ofan.