Of­beldi bak við glanslífið

Henny Hermannsdóttir var kjörin alheimsfegurðardrottning Miss Young International árið 1970 og við það breyttist allt hennar líf.

Hún varð þjóðareign og allir höfðu skoðun á þessari fallegu og sjarmerandi ungu konu sem vann sem dansari með foreldrum sínum Unni Arngrímsdóttur og Hermanni Ragnarssyni. Vala Matt ræddi við Henny í Íslandi í dag í kvöld.

Henny varð gríðarlega áberandi og var í öllum fjölmiðlum, blöðum, tímaritum og sjónvarpi. En raunveruleikinn var ekki bara glamúr og glanslíf því bak við tjöldin gerðist ýmislegt miður skemmtilegt.

Erfitt að tala um

Henny var að gefa út ævisögu sína sem fjölmiðlakonan Margrét Blöndal skrifar, en þar segir Henny meðal annars frá mjög átakanlegum tímabilum ævi sinnar þar sem hún þurfti að þola bæði andlegt og líkamlegt ofbeldi í mörg ár.

„Það var mjög erfitt að segja frá þessu í bókinni,“ segir Henny og heldur áfram.

„Þetta er tímabil sem maður vill helst gleyma og ég hélt alltaf að dagurinn á morgun yrði betri en dagurinn í gær. Eftir því sem dagarnir liðu þá vildi ég bara henda þessu öllu saman aftur fyrir mig og hef aldrei sagt einum né neinum.“

Í dag er Henny enn að glíma við afleiðingar ofbeldisins bæði líkamlega og andlega. Hún fer helst ekki mikið út úr húsi og fer helst ekki í Kringluna eða Smáralindina og sárasjaldan í bíó eða leikhús því þá hellist yfir hana kvíði og hún vill helst af öllu vera bara heima hjá sér í sínu öryggi því henni finnst hún vera svo berskjölduð. Meðan á ofbeldinu stóð leit alltaf allt voðalega vel út á við hjá Henny.

„Ég get sagt þér það að ég er ekki góður leikari en þarna var ég mjög góður leikari. Ég var alveg tvær manneskjur. Það var bara brosað og sett á sig meikið til að fela.“

En smám saman er Henny að verða sterkari og máttur þess að segja sögu sína upphátt er undraverður og hún hefur nú að vissu leiti endurheimt völdin í eigin lífi. 

Hér að neðan má sjá viðtalið við Henny.