Segir tilfinningar eldmóð allra

Atferlisfræðingur, sem segir tilfinningar eldmóð allra, telur fyrirtæki geta náð betri árangri á sínu sviði sé sérstaklega gætt að því að ræða tilfinningaleg mál sem koma upp í vinnunni. Starfsfólk þurfi rými til slíkra samtala, úrvinnslu sinna mála og aðstoð til að festast ekki í vondri líðan. Það sé ábyrgð vinnustaðarins að fólki líði vel, það sé ekki bara þeirra persónulegu mál eftir vinnutíma.

Tilfinningar er eitt af því sem gerir okkur mannleg en eru ekkert endilega velkomnar með okkur á vinnustaðinn. Phill Willcow atferlisfræðingur segir hins vegar að hægt sé að koma í veg fyrir kulnun í starfi hjá mörgum ef við opnum á samtal um tilfinningar á vinnustaðnum.

„Ef það er tímalína þá endast tilfinningar í augnablik, nokkrar sekúndur eða mínútur. Kulnun er miklu meira lamandi. Það sem gerist er að einstakar tilfinningar hlaðast upp og mynda þessa kulnunartilfinningu. Það sem ég mæli með er að við grípum snemma inn í. Það er snemmbúið inngrip og ef við getum fengið fólk til að tala um hvernig því líður þá kemur ekki að því að fólk kulni eða það þarf að kljást við geðræn vandamál eins og kvíða eða þunglyndi,“ segir Phill Willcow atferlisfræðingur.

Phill hélt fyrirlestur á mannauðsdegi í Hörpu en hann rekur ráðgjafarþjónustu í London sem sérhæfir sig í að hjálpa fyrirtækjum að bæta samskipti og nýta tilfinningar mannauðsins til að styrkja fyrirtækið enn frekar. Hann segir fólk yfirleitt óttast að ræða tilfinningar við yfirmann sinn því það gæti sýnt of mikinn veikleika.

„Tilfinningar stjórna hegðun. Tilfinningar gefa okkur orku til að gera hluti og ef við erum óánægð með eitthvað sem er að gerast, annað hvort varðandi viðskiptavini eða eitthvað sem á sér stað á vinnustaðnum þá þurfum við að gera eitthvað við þessa orku og ef við getum notað hana á uppbyggjandi hátt til að byggja upp sambönd og samstarf þá er það gagnlegt fyrir vinnustaðinn. Ef við notum hana á skaðlegan hátt þannig að hún brjóti niður sambönd og samstarf þá er það slæmt fyrir vinnustaðinn,“ segir Phill Willcow.