Sakar borgarstjóra um að hafa „hrútskýrt“ fyrir sér hvernig fjárframlög eru reiknuð

Tillögu Hildar Björnsdóttur, borgarfulltrúa Sjálfstæðisflokksins, um jöfn fjárframlög með börnum í leik-og grunnskólum og frístundaheimilum borgarinnar óháð rekstrarformi var vísað til borgarráðs á fundi borgarstjórnar í dag.

Hildur tók til máls á Facebook síðu sinni og sakaði Dag B. Eggertsson, borgarstjóra, um að hafa „hrútskýrt“ fyrir sér hvernig fjárframlög til grunnskóla og leikskóla í borginni eru reiknuð. „Hann sagði tillöguna vanhugsaða og byggða á þekkingarleysi. Er þetta ekki dæmigert?“ spyr Hildur.

Hún segir að tillaga sín, sem ætluð er til að koma í veg fyrir innheimtu skólagjalda og tryggja öllum borgum jöfn tækifæri til að sækja ólíka skóla í borginni hafi verið ítarleg og vel ígrunduð. Tillagan hafi verið unnin í nánu samstarfi við skólastjórnendur sjálfstæðra grunnskóla og leikskóla og hagsmunasamtök sjálfstæðra skóla.

„Hrútskýringar borgarstjóra voru því ekki eingöngu ósmekklegar, heldur fullkomlega óþarfar,“ segir Hildur.

Segir meirihlutann finnast rétt að mismuna í sparnaðarskyni

Hildur segir meirihlutann í borginni virðast þykja rétt að mismuna börnum í sparnaðarskyni í ljósi þess að fulltrúar meirihlutann hafi lýst yfir áhyggjum af kostnaði.

„Það væri óskandi að borgarstjóri horfði með sama hætti í hverja krónu þegar hver framkvæmdin á fætur annarri fer margfalt fram úr áætlunum á hans vakt. Það mætti eflaust fjármagna tillöguna með einum Bragga. Til dæmis,“ segir Hildur.

Hún segir að það vaki athygli að Viðreisn hafi ekki treyst sér til að styðja við töllöguna þrátt fyrir „fögur fyrirheit í kosningabaráttu“. Hún bætir við að hún geti ekki lengur séð muninn á stjórnmálaflokkunum Samfylkingu og Viðreisn. 

Verið að slá ódýrar pólitískar keilur

Þórdís Lóa Þórhallsdóttir, formaður borgarráðs og oddviti Viðreisnar í Reykjavík, svarar ummælum Hildar og annarra í stöðuuppfærslu á Facebook síðu sinni. Hún segir að sem formaður borgarráðs leiðist sér að sjá borgarfulltrúa slá ódýrar pólitískar keilur.

Það sé hvorki verið að fela né flækja tillögur með því að vísa þeim til borgarráðs.

„Það er nefnilega ekki svo heldur er tilgangurinn að vinna tillögurnar áfram. Þannig vill meirihlutinn vinna með minnihlutanum að góðum málum,“ segir Þórdís.

 

Segist hlakka til að vinna með tillöguna í borgarráði

Hún segist hlakka til að takast á við tillögurnar tvær, sem annars vegar lúta að grunnskólum og frístundaheimilum og hins vegar leikskólum. „Það kemur engum á óvart að Viðreisn styður fjölbreytt rekstrarform og sjálfstæði skóla en við þurfum að skoða þetta í stærra samhengi. Við þurfum að skoða leikskólana, grunnskólana og frístundina,“ segir Þórdís.