Enn ein lægðin á morgun

Næstu dagar verða lítt frábrugðnir veðrinu að undanförnu. Búast má við mildri austlægri átt og að það verði fremur vætusamt, sérstaklega á Suðausturlandi.

„Á morgun kemur enn ein lægðin upp að landinu og fer vindur vaxandi allan daginn og nær hámarki seinnipartinn og annað kvöld, víða 15-23 m/s en allt að 28 m/s um tíma á svæðinu frá Mýrdal og vestur undir Þjórsárdal. Hviður mun hvassari,“ segir í hugleiðingum veðurfræðings á vef Veðurstofunnar.

Þar segir að óveðrið muni aðeins standa í nokkra klukkutíma og að þeir sem þurfi að fara akandi á milli landshluta að fylgjast vel með veðri á morgun. Þessu fylgir rigning og aukin hlýindi, mesta úrkoman verður á Austfjörðum og Suðausturlandi, en þar má búast við töluverðri rigningu seinnipartinn á morgun og fram á þriðjudag.

Veðurhorfur á landinu

Austlæg átt, 8-18 og víða rigning með morgninum, hvassast og jafnvel slydda á Vestfjörðum, en þurrt að kalla SV-lands. Lægir norðantil og styttir upp í kvöld, en SA 8-13 og skúrir syðra. Hiti 1 til 8 stig, mildast syðst.

Vaxandi austlæg átt á morgun, víða 15-23 seinnipartinn, en 23-28 um tíma syðst. Dregur úr vindi um kvöldið. Rigning með köflum, en talsverð rigning á Austfjörðum og SA-landi. Þurrt NV-til fram á kvöld. Hlýnar, hiti 3 til 9 stig annað kvöld.

Veðurhorfur á landinu næstu daga

Á mánudag:

Austlæg átt, 8-13 m/s framan af degi, en hvessir síðan, 15-25 um kvöldið, hvassast syðst um tíma seinnipartinn. Rigning víða um land, talsverð væta SA-lands um kvöldið, en úrkomulítið NV-til. Hiti 2 til 7 stig.

Á þriðjudag:

Austlæg átt, 8-15 m/s, hvassast á annesjum og talsverð væta A-til, en annars mun úrkomuminna. Hiti 0 til 5 stig.

Á miðvikudag:

Austlæg eða breytileg átt og víða dálítil úrkoma, einkum fyrir norðan. Hiti 0 til 5 stig, en sums staðar vægt frost inn til landsins.

Á fimmtudag:

Fremur hæg austlæg átt og yfirleitt þurrt. Frostlaust að kalla með ströndinni en annars 1 til 8 stiga frost.

Á föstudag og laugardag:

Útlit fyrir austan og norðaustan kalda með smá vætu og mildu veðri á S- og A-verðu landinu, en hægari, þurrt að kalla og vægt frost fyrir norðan.