Skiptimarkaður fyrir jólagjafir og föt

Jólagjafaskiptimarkaður stendur nú yfir á farfuglaheimilinu Loft Hostel í Bankastræti. Einu sinni í mánuði getur fólk mætt með föt eða annan varning á skiptimarkaðinn.

Að þessu sinni er markaðurinn sérstaklega helgaður jólum og getur fólk því skipt jólagjöfum sem það hefur ekki lengur not fyrir og fundið nýja flík eða gjöf.

Vinkonurnar Vala og Iðunn segja í samtali við fréttastofu að þær hafi komið með nokkur föt fyrir markaðinn í þeirri von að finna eitthvað fínt í staðinn.

Þær fundu peysu og handklæði á markaðnum sem gæti jafnvel nýst til jólagjafa. Iðunn segist vera búin að kaupa allar jólagjafirnar en Vala á enn eftir að kaupa nokkrar.