„Það á enginn að vera húsnæðislaus“

Borgarfulltrúi Sósíalistaflokksins gagnrýnir að ekki standi til að hafa tjaldsvæðið í Laugardal opið heimilislausu fólki í vetur. Hámarksdvalartími á svæðinu verður ein vika og hvorki verður heimilt að vera með hjólhýsi né húsbíla á svæðinu.

Á svæðinu verður því einungis boðið upp á skammtímaþjónustu við ferðamenn og munu þeir húsnæðislausu ekki geta dvalið þar til lengri tíma. Borgarfulltrúi Sósíalistaflokksins segist uggandi yfir stöðu mála, en óvíst er hvert þessir einstaklingar geti leitað.

„Ég tel þetta endurspegla húsnæðiskreppuna sem er nú til staðar. Fyrir marga er ógerlegt að fá húsnæði á verði sem það ræður við. Einstaklingar eru settir í mjög erfiða stöðu og tjaldsvæðið hefur verið það úrrræði sem fólk hefur leitað í. Maður hefur áhyggjur af stöðunni en getur með engu móti sett sig í spor þeirra sem standa nú frammi fyrir því að vita ekki hvert þeir geti leitað,“ sagði Sanna Magdalena Mörtudóttir, borgarfulltrúi Sósíalistaflokksins.

Þá segir hún úrræðið í Víðinesi ekki lausn þar sem staðsetning rýmis er einangrandi fyrir marga en nokkrir kílómetrar eru í næstu strætóstoppistöð.

„Við þurfum langtímalausnir. Búseta á tjaldsvæði er ekki lausn við húnsæðisvandanum sem nú ríkir. Stjórnandi tjaldsvæði hefur lýst því yfir að hann sé opinn fyrir viðræðum um samstarf við borgina á leigu fyrir þá sem vantar búsetuúrræði. En borgin virðist hafa átt í einhverjum viðræðum en ekki formlega leitað eftir samstarfi.  Það gengur alls ekki að fólk sé komið í þá stöðu að geta ekki leitað annað. Við þurfum að bregðast hratt við. Það á enginn að vera húsnæðislaus,“ sagði Sanna Magdalena.