Alvogen fer fram á lögbann á lyf sem nota á í aftöku

Alþjóðlega lyfjafyrirtækið Alvogen hefur höfðað mál gegn Nevada ríki í Bandaríkjunum en ríkið hyggst nýta lyf fyrirtækisins í aftöku.

Til stendur að Scott Dozier verði tekinn af lífi í Nevada ríki í Bandaríkjunum klukkan þrjú í nótt að íslenskum tíma. Hann var dæmdur til dauða árið 2007 fyrir að drepa og aflima 22 ára gamlan mann í Las Vegas.

Við aftökuna á Dozier verður notuð lyfjablanda þriggja lyfja. Fentanyl, Cisatracuri­um Besyla­te og Midazolam, sem er ró­andi lyf sem Al­vo­gen fram­leiðir. Þetta er í fyrsta sinn sem þessi lyfjakokteill er notaður við aftöku. Dozier hefur sjálfur sagt að lífstíðarvist í fangelsi sé ekkert líf og hefur óskað eftir því að vera tekinn af lífi sem allra fyrst.

Alvogen hefur farið fram á lögbann á notkun Midazolam en Halldór Kristmannsson, framkvæmdastjóri hjá Alvogen, segir í samtali við fréttastofu að það samræmist ekki stefnu Alvogen að selja lyf til fangelsismálayfirvalda með það að leiðarljósi að taka fólk af lífi. Alvogen telur að fangelsismálayfirvöld í Nevada hafi þannig útvegað lyfið með ólögmætum hætti, án þess að tilgreina í hvað það skuli notað.

Halldór segir að fyrirtækjamenning Alvogen og öll þróun og markaðssetning lyfja fyrirtækisins hafi það markmið að auka lífsgæði fólks og það séu því mikil vonbrigði að yfirvöld í Nevada fyrirhugi að nota lyf fyrirtækisins með ólögmætum hætti.

Teljast verður ólíklegt að lögbannskrafan komi í veg fyrir aftökuna þar sem hún verður tekin fyrir í dómstóli í Nevada klukkustund eftir að aftakan mun eiga sér stað.