Ástralskir hermenn flögguðu hakakrossi

Forsætisráðherra Ástralíu gagnrýnir hóp ástralskra hermanna sem flaggaði Nasistafána við skyldustörf í Afganistan. Malcolm Turnbull segir að framganga þeirra sé „fullkomlega og algjörlega óásættanleg“ en bætir við að mennirnir hafi fengið aðvörun á sínum tíma.

Myndin, sem sjá má hér að ofan, rataði í ástralska fjölmiðla nú í morgun og hefur þegar valdið nokkrum usla. Henni er lýst sem viðbót við það uppgjör sem átt hefur sér stað í landinu um þátttöku Ástrala í stríðinu í Afganistan.

Þarlendir fjölmiðlar hafa síðustu vikur verið undirlagðir fregnum af áströlskum hermönnum sem taldir eru hafa tekið fjölda óbreyttra og óvopnaðra Afgana af lífi. Um 300 ástralskir hermenn eru enn að störfum í Afghanistan.

Á myndinni, sem tekin var árið 2007, má sjá hóp hermanna sitjandi á herbifreið sem búið er að skreyta með rauðum fána. Í honum miðjum má sjá hakakrosinn, sem þrátt fyrir langa sögu er álitinn táknmynd þýska Nasistaflokksins og þess hryllings sem hann innti af hendi.

Haft er eftir ónefndum hermanni að hópurinn hafi ekki verið að lýsa yfir stuðningi við nasismann. Aðeins hafi verið um „sjúkt grín“ að ræða. Ástralski herinn segir að fáninn hafi einungis fengið að hanga upp í skamma stund áður en hermennirnir fengu aðvörun og voru beðnir um að fjarlægja hann.

Herinn tekur jafnframt fram að hann fordæmi fánann og allt það sem hann stendur fyrir. Rannsókn ástralskra stjórnvalda á þátttöku landsins í stríðinu í Afghanistan hefur staðið yfir í tvö ár. Ekki er gert ráð fyrir öðru en að myndin rati í lokaskýrslu sem gefin verður út um niðurstöður rannsóknarinnar. Hvenær hennar er að vænta liggur þó ekki fyrir.