Dreymir enn árás hundsins

Drengurinn, sem hundur af tegundinni Alaska Malamute réðst á í lok mars síðastliðnum, hefur farið í tvær tveggja klukkustunda langar aðgerðir vegna bitfaranna sem hann hlaut. Meðal annars var grætt skinn á hluta ennis hans og er gert ráð fyrir um þremur lýtaaðgerðum á næstu mánuðum. Þá fær drengurinn enn reglulegar matraðir eftir árásina, þar sem hann dreymir að hundurinn sé að „borða hann og bíta.“

Þetta er meðal þess sem fram kemur í bréfi foreldra drengsins til heilbrigðisnefndar Kópavogs, sem dagsett er um miðjan mánuðinn.

Í bréfinu reifa þau málið, sem vakti mikinn óhug á sínum tíma, ekki síst vegna þess að það þurfti að sauma 80 spor í andlit drengsins. Vísir gerði málinu ítarleg skil, eins og sjá má í fréttinni: Bitinn póstmaður sér eftir að hafa ekki tilkynnt áttatíu spora sleðahundinn. Ríkisútvarpið greindi fyrst frá bréfi foreldranna.



Foreldrarnir segja í bréfinu að þau hafi sett sig í samband við heilbrigðisnefndina í upphafi árs, þegar umræddur hundur réðst á póstmann í hverfinu. Hundurinn veitti honum sár á höndina og reif úlpu póstmannsins. Í samtali við nefndina lýstu foreldrarnir áhyggjum sínum af hegðun hundsins, sem sagður er hafa sýnt árásargirni í garð vegfarenda og ítrekað sloppið frá eigendum sínum. Þó hafi það verið ummerkin á póstmanninum sem fyllt hafi mælinn.

Máttu ekki kæra nafnlaust

Starfsmaður nefndarinnar hafi hins vegar tjáð foreldrunum að þau gætu ekki kvartað fyrir hönd annarra, póstmaðurinn þyrfti að gera það sjálfur. Vildu þau kæra nágranna sína fyrir dýraníð þyrftu þau jafnframt að gera það undir nafni, eitthvað sem þau treystu sér ekki til. Að endingu hafi heilbrigðisnefndin því ekki geta brugðist við ábendingu þeirra með formlegum hætti.

Í samtali við Vísi sagði póstmaðurinn að hann sæi eftir því að hafa ekki tilkynnt bitið. Hann hafi viljað gera eigandanum greiða, enda væri hann sjálfur hundaeigandi til margra ára. „En svo varð þetta ógreiði eftir að hundurinn beit krakkann,“ sagði póstmaðurinn Sigursteinn Magnússon. 

Foreldrarnir settu sig í sambanda við eigendur hundsins sem lofuðu að koma upp sérstakri girðingu í garði sínum. Hún hafi hins vegar aldrei risið. Það var svo þann 30. mars síðastliðinn, um tveimur mánuðum eftir að þau settu sig í samband við heilbrigðisnefndina, sem hundurinn réðst á son þeirra, sem var að undirbúa sig fyrir hjólreiðatúr. Foreldrarnir þakka fyrir að drengurinn hafi verið með hjólreiðahjálm, hann hafi án efa bjargað því að ekki fór verr.

Foreldrarnir kvarta yfir því að starfsmaður heilbrigðisnefndar hafi ekki tjáð þeim að þau hefðu getað leitað á náðir Matvælastofnunar með kvörtun sína. „Svo virðist sem enginn af vinum, ættingjum eða nágrönnum okkar hafi vitað um að MAST væri sú stofnun sem ætti að leita til þegar fólk hefði áhyggjur af meðferð hunda,“ skrifa þau í bréfi sínu til nefndarinnar.

Í bréfi sínu kalla þau eftir upplýsingum um málsmeðferðina og segja að mál þeirra sýni fram á „augljóslega“ sé bóta þörf hjá heilbriðisnefndinni. Þau vilji jafnframt fá að vita hvort MAST hafi verið gert viðvart og hvort Pósturinn hafi tilkynnt um árásina í janúar. Þá gagnrýna þau jafnframt að lögreglan hafi ekki getað náð sambandi við heilbrigðisnefndina eftir árásina. Því hafi þurft að kalla út sérsveitina til að taka hundinn þar sem ekki náðist heldur í húsráðanda. Það sé von foreldranna að málið verði til þess að nefndin auki eftirlit með hundum og endurskoði bannlisti yfir hættulegar hundategundir.

Segjast hafa farið að reglum

Í svari nefndarinnar til foreldranna segir að hún harmi þetta „alvarlega atvik,“ en meti það engu að síður sem svo að hún hafi brugðist við beiðni þeirra samkvæmt hlutverki sínu, en framkvæmdastjóra hennar var falið að svara erindinu.

Heilbrigðisnefndin vísar því jafnframt á bug að ekki hafi náðst í starfsmenn nefndarinnar þegar á reyndi. Í bréfinu segir að „engin tilraun hafi verið gerð til að ná á starfsmann“ þegar umrætt atvik átti sér stað.

Um er að ræða þriðja málið á einu ári þar sem Alaskan Malamute hundur hefur ráðist á barn eða fullorðinn. Hundar af þessari tegund hér á landi koma í langflestum tilfellum frá Ásgarðsheima Kennel, einu ræktuninni með slíka hunda hér á landi. Hundinum sem réðst á drenginn var lógað.