„Þetta er að hjálpa okkur að hjálpa öðrum“

Til stendur að perla að minnsta kosti fjögur þúsund armbönd í íslensku fánalitunum í stúkunni við Laugardalsvöll í dag. Átakið fer fram til styrktar ungu fólki með krabbamein, og ætla landsliðsþjálfararnir í knattspyrnu meðal annars að etja kappi í armbandagerð.

Undanfarið hefur Kraftur, styrktarfélag ungs fólks með krabbamein, staðið fyrir ýmiss konar viðburðum og uppákomum í fjáröflunarskyni fyrir unga krabbameinsgreinda og aðstandendur þeirra. Litrík armbönd með orðunum Lífið er núna hafa verið eins konar einkennismerki átaksins. Ástrós Rut Sigurðardóttir, formaður Krafts, segir það viðeigandi skilaboð.

„Lífið er núna er að sjálfsögðu eitthvað sem á við alla. Okkur langaði að breiða þennan boðskap út, að lifa svolítið í núinu og njóta þess að vera til,“ segir Ástrós.

Perluðu 3.972 armbönd í febrúar

Viðburðurinn í dag stendur yfir milli klukkan tólf og fjögur og taka fjölmargir skemmtikraftar og íþróttafólk þátt í átakinu. Allir eru velkomnir á staðinn að perla að sögn Ástrósar, en fjölmenni var á svipuðum viðburði í febrúar þar sem forseti Íslands perlaði meðal annars armbönd.

„Á þeim degi í Hörpu voru perluð 3.972 armbönd. Það er Tólfunni mikið kappsmál að slá þetta Íslandsmet, þannig að við ætlum að reyna við það í dag.“

Ástrós bendir á að það sé mikið áfall fyrir ungt fólk að greinast með krabbamein, bæði andlega og fjárhagslega. Markmið Krafts er að veita þessum hóp og aðstandendum fjölbreyttan stuðning.

„Bæði í að veita sáluhjálp, stuðning, ráðgjöf, fjárhagslegan stuðning. Við erum með ný verkefni og hugmyndir sem geta loks orðið að veruleika út af þessari sölu,“ segir Ástrós.

Þannig nefnir hún meðal annars svokallaðar endurhæfingarhelgar og ýmiss konar skemmtilega viðburði, þar sem félagsmenn geti mætt, notið lífsins og hugsað um annað en veikindin.

„Þetta er að hjálpa okkur að hjálpa öðrum,“ segir Ástrós að lokum.