Segir tillögur sínar ekki tengjast komandi kosningum

Uppfært 21:15: Tillögu Sveinbjargar Birnu Sveinbjörnsdóttur um afturköllun á lóð undir mosku handa Félagi múslima var vísað frá á fundi borgarstjórnar í kvöld.

Borgarfulltrúinn Sveinbjörg Birna Sveinbjörnsdóttir segir tillögu sína um afturköllun á lóð Félags múslima ekki tengjast komandi kosningum. Hún vilji einfaldlega fylgja málinu eftir, enda sé félagið komið framyfir fresti til að byggja mosku.

Sveinbjörg hyggst leggja tillöguna fyrir á síðasta borgarstjórnarfundi kjörtímabilsins í kvöld. Þar er lagt til að lóðaúthlutunin frá 2013 verði afturkölluð og farið verði í samtal við hagsmunafélög eldri borgara um uppbyggingu á lóðinni. Hún bendir á að ekkert bóli á byggingarframkvæmdum af hálfu félags múslima.

„Maður spyr sig kannski hvort þeir hefðu sjálfir átt að segja bara við höfum ekki staðið við framkvæmdaskilmála og höfum ekki tryggt fjármögnun á henni, og þar af leiðandi þá skilum við henni,“ segir Sveinbjörg.

Mælist með eitt prósent í skoðanakönnun

Sveinbjörg býður nú fram fyrir nýjan lista, Borgina okkar Reykjavík. Framboðið mældist með fylgi upp á eitt prósent í skoðanakönnun Fréttablaðsins fyrir réttri viku síðan. Miðað við þá niðurstöðu á Sveinbjörg því langt í land með að halda í sæti sitt í ráðhúsinu.

Er þetta svona síðasti séns til að veiða fylgi hjá þér?

„Nei, ég held að í ár geti ég lagt fram þá vinnu sem ég hef unnið í minnihlutanum í sterkri stjórnarandstöðu við meirihlutann í borginni. Þetta er raunverulega bara það að ég er alin upp við það að klára það sem ég byrja á,“ svarar Sveinbjörg.

Ræddi málið einnig fyrir síðustu kosningar

Sveinbjörg viðraði svipaðar hugmyndir þegar hún bauð fram fyrir Framsókn og flugvallarvini 2014, þá á þeim forsendum að lagatúlkun borgaryfirvalda stæðist ekki skoðun. Þannig hefur borgin heimfært lagaskyldu sína til að leggja þjóðkirkjunni ókeypis lóðir undir kirkjur yfir á önnur trúfélög einnig á grundvelli jafnræðisreglu og taldi sér því skylt að veita Félagi múslima fría lóð undir mosku.

Er þér í nöp við múslima?

„Þetta er stór spurning. Ekki frekar en mér er í nöp við kristna. Innan hóps múslima, kristna, búddista, við erum öll mismunandi. En það er auðvitað þannig að í moskum er ekki bara tilbeiðsluhús, það er náttúrulega dómshús og svona uppfræðisetur, öfugt við kirkjuna.“